ORANJESTAD (AAN): Departamento di Impuesto ta recorda tur comerciante,
cu a beneficia di e areglo pa comerciante chikito (kleineondernemersregeling of KOR) pa aña 2022 y cu no a cumpli cu nan deber di entrega e declaracion anual di BBO/BAVP y BAZV 2022, cu nan mester cuminsa declara y paga BBO/BAVP y BAZV tur luna cuminsando cu januari 2023.
Con ta haci declaracion?
E comerciante ta haci declaracion digital di BBO/BAVP y BAZV tur luna. Esaki ta sosode via e portal ‘BO impuesto’ (of BOi).
Pa e usuarionan di BOi cu tin un periodo cu no ta uzando e portal, ta recomendabel pa log in mas lihe posibel pa controla si e password ta valido ainda. Si e password a caduca mester drecha esaki mas lihe posibel pa no haya contratiempo ora cu mester entrega e declaracion di BBO/BAVP y BAZV. Si tin pregunta por yama 5227437 of manda un e-mail na عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
Con mester yena e declaracion?
Aki ta sigui un ehempel con e comerciante chikito ta yena su declaracion den un situacion normal. Volumen di benta (bedrijfsomzet) di januari 2023 Afl. 2.000
Ta yena e declaracion asina:
Vrijgestelde omzet: 0,00 (nihil)
Belaste omzet BBO en BAVP: 2.000
Belaste omzet BAZV: 2.000
E sistema automatisa mes lo calcula e suma di impuesto. Tuma nota cu no por yena e suma di benta na ‘vrijgestelde omzet’. E seccion aki ta pa e comerciantenan cu pa ley tin un actividad cu ta cay bou dispensacion di impuesto.
Fecha final pa haci declaracion
E fecha final pa haci e declaracion y pago di luna di januari 2023 ta 17 di april 2023. E declaracion lo ta disponibel den e portal “BO impuesto” dia 17 di maart 2023. E fecha final pa haci e declaracion y pago di luna di februari 2023 ta 15 di mei 2023. E declaracion di februari lo ta disponibel den e portal “BO impuesto” dia 15 di april 2023. Si haci declaracion y/of pago despues di e fechanan menciona of keda sin cumpli, esaki lo nifica cu automaticamente e comerciante lo haya un cobransa adicional (naheffingsaanslag) inclui boet pa incumplimento.
Departamento di Impuesto ta haci un apelacion fuerte na tur comerciante pa cumpli tur luna cu e declaracion di BBO/BAVP y BAZV na tempo y asina evita tambe gasto extra innecesariamente. E fecha final ta 15 di cada luna.
Por consulta e fechanan final via e website: https://www.impuesto.aw/deadlines
