Na momento cu credibilidad den politica mester wordo renoba
*Investigacion Caso Kwihi hancra den “Ley pa uno y Ley pa tur”
*E responsabilidad di un Ministro pa su Ministerio den luz nobo
ORANJESTAD (AAN) — Na momento cu un persona presta huramento como gobernante di un pais, e ta dicidi riba credibilidad di e sistema politico di un pais.
Na momento cu papia di democracia, ta papia di “Ley pa Uno y Ley pa Tur”, loke ta encera cu ningun hende ta riba Ley.
For di momento cu e historia politico di e pais hoben, Aruba, a cuminsa conoce paginanan skirbi pa scandal cu persecucion legal di politiconan cu ta forma parti di gobernacion, credibilidad di Pueblo den e sistema democratico di e pais, a sufri grandemente.
Por nota con un cantidad creciente di persona a dicidi cu no ta vota mas.
Investigacionnan y rapportnan cu a duna atencion na e credibilidad di politica, tabata baha cu aumento di casonan penal den cual politiconan tabata envolvi,
Manera DIARIO a trece dilanti algun dia pasa, e hecho cu durante Gobernacion di Gabinete Evelyn Wever-Croes 2 a cuminsa cu investigacion di un caso den cual un Ministro di gabinete anterior lo ta e figura central, a cuminsa crea un speransa cu e partidonan actualmente den Gobierno, por tuma pasonan cu ta restablece e confiansa necesario den politica.
E hecho cu ex Ministro Romero ta bou investigacion di Husticia awor, ya a habri porta pa mas confiansa den e Gobierno actual, cu a honra e pensamento cu e mester tuma pasonan tambe contra Edison Briesen, cu ta su consehero y representante den entre otro Refineria di Aruba.
E anuncio cu Briesen tampoco ta parti mas di labornan gubernamental, ayera a fortifica e pensamento, cu politica na Aruba ta subi e caminda cu democracia ta exigi.
Mester bisa cu e decisionnan cu a wordo tuma dor di Prome Ministro Evelyn Wever-Croes ta duna confiansa cu Husticia na Aruba ta un realidad y cu democracia ta wordo sirbi cu “ley pa uno y ley pa tur”.
E decision di Prome Ministro Wever-Croes ta habri caminda pa pone e forma cu ley ta atende e responsabilidad di un Ministro pa su Ministerio, por wordo pone den un luz nobo.
DIARIO a puntra den su articulonan ora tabata trata di e conocemento di acusacionnan contra Benny Sevinger, si como Prome Ministro, Mike Eman, no tabata na haltura di loke ta pasa.
Esaki sigur si mira con den e investigacionnan di miembronan di su partido den caso criminal, Mike Eman a sostene a pensamento cu nan ta inocente prome cu Huez a papia.
Den e caso aki, Prome Ministro Wever-Croes ta tuma e medidanan necesario pa nomber di Aruba como pais no ta parti di un investigacion penal, aunke Husticia por puntra su persona, si e sabi algo di e caso.
Sin duda Husticia mester pone su mes na haltura si tabata tin mas hende cu conocemento di loke ta wordo sospecha cu a socede bou direccion di ex Ministro Romero.
Prome Ministro Wever-Croes a tuma e posicion corecto, cu ta duna credibilidad na su gobernacion cu ta sumamente necesario mientras Gabinete Wever-Croes mester duna guia na Aruba den e epoca di reforma y creacion di un futuro mundial nobo.
E actuacion di Prome Ministro Wever-Croes y e Gobierno forma pa MEP y Raiz, ta presenta un panorama cu ta sostene e pensamento cu Aruba ta wordo goberna como Estado di Derecho y a base di democracia, den cual Ley pa Uno ta Ley pa Tur.
