ORANJESTAD (AAN): E ciudadano Kelvyn enberdad a cumpra ticket pa e sorteo di Mini Mega cu tabatin pa Diabierna 2 di Juli 2021. El a cumpra su numbernan, y pagando 2 Florin extra, el a haci esaki un Mini Mega Plus.
E premio tabata na 500 mil Florin, pero como cu el a pone 2 Florin acerca, e ta eligible pa e premio cu ta subi y yega na 680 mil Florin.
E anochi ey, e numbernan ganador a bira 12, 22, 23, 40, y Mega Ball ta 02. E computer a indica cu tin 1 solo ganador di e Mini Mega Plus, y e ticket ganador a wordo cumpra na Botanica Koyari.
Pero e siguiente siman, Lotto a keda warda riba e ganador, pero nada. E siguiente siman tambe, na na keda warda pa e ganador presenta, sinembargo e no a yega. Toch segun regla, e ganador tin 90 dia di tempo pa reclama su premio.
A resulta cu e ganador no sa mes cu el a gana! Kelvyn a keda cu e ticketnan benta un banda tur e dianan ey, sin check si acaso e lo por a libra algo.
Porfin siman pasa el a dicidi na bay tira un bista riba su ticketnan, y aki el a bin ripara cu e ta e ganador di e premio gordo di 680.000 Florin.
Pesey mes cu un cara feliz, el a presenta Diabierna siman pasa na Oficina di Lotto na Playa pa reclama su premio. Aki mesora e empleadonan di Lotto a check si el a firma e banda patras di e ticket, y despues a scan e barcode. E computer a indica inmediatamente cu el a gana 680 mil Florin.
El a bisa e funcionarionan di Lotto, cu e no tabata na altura mes. Y cu ora el a bay check su ticketnan, el a keda totalmente sorprendi cu e ta e feliz ganador.
Y bo por mira su felicidad na momento di a cobra su premio. El a duna nan su cuenta di banco pa asina electronicamente transferi su premio.
