Colegio San Antonio ta stimula alumnonan riba e area di NAIK

Prome Minister ta impresiona

 *Studiantenan mes ta traha nan weganan y haci e coding 

ORANJESTAD (AAN): Diamars mainta dia 18 di juni, studiantenan di Colegio San Antonio a presenta nan proyectonan di NAIK (Natuurkunde-Informatiekunde) na Prome Minister Evelyn Wever-Croes.

   Despues di un caluroso bonbini di parti di cabesante di Colegio San Antonio y docentenan, Prome Minister hunto cu Minister di Enseñansa y Deporte Endy Croes a worde dirigi na un lokaal special unda e alumnonan a prepara nan proyectonan. Akinan studiantenan di Mavo 1 te cu examenklas, cu hopi orguyo, a presenta nan proyectonan di Natuurkunde y Informatiekunde, NAIK, na e mandatarionan. Cada alumno a duna su propio presentacion mustrando su habilidad, creatividad y inteligencia y por a mira cuanto talento tin entre e hobennan aki.

   Durante e mainta aki por a mira con alumnonan mes ta traha nan weganan y haci e coding. Tabata interesante pa wak con ta combina e Informatiekunde y e Natuurkunde a traves di un robot cu ta haci e testnan di Natuurkunde, asina e alumnonan ta compronde miho e materia. Por ehempel por a observa kico ta determina e velocidad di un auto y con e peso di esaki ta influencia e velocidad.

   Pa Prome Minister di Aruba tabata un placer di por a presencia e demostracionnan aki riba e tereno importante di tecnologia. “Mi ta contento di wak con Colegio San Antonio ta stimula e hobennannan riba e area importante aki ya cu esaki ta e trabaonan di futuro. Mi ta felicita y alavez gradici e docentenan y principalmente e alumnonan pa a comparti e mainta aki cu nos y pa transmiti nan talento y conocemento. Proyectonan asina no solamente ta fortalece e conocimento di e alumnonan, pero tambe ta aporta na futuro profesionalnan riba e tereno aki cu ta uno di gran importancia pa e añanan cu ta bin”, Prome Minister a remarca.