Magaly Brito, Secretario General:
ORANJESTAD (AAN) — Den entrevista cu DIARIO, Secretario General di Sindicato di Empleadonan Publico y Priva (SEPPA), a referi na un reunion urgente cu SEPPA tabata tin cu Minister Geoffrey Wever, encarga cu Post NV, Dialuna cu a pasa.
E reunion aki a tuma lugar despues cu e Sindicato a dirigi dos carta na e mandatario unda a pidi su atencion pa e problema di aumento di costo di bida, cu ta conta tambe pa e trahadornan di Post NV.
Brito a comenta cu ta asina cu enberdad tin un caso andando, di e 105 florin. Tabata tin dos grupo di trahado cu ya a gana e caso, pero di otro banda tin casonan cu den apelacion cu mester warda.
“Pero tin hopi tempo ta pasando caba y mientras tanto nos ta wak cu gobierno a yega na un acuerdo pa su trahadornan unda e ta reconoce cu ta un obligacion etico y moral di un dunador di trabao, pa tene cuenta cu na momentonan cu costo di bida ta asina drastico, mester haci algo”, Magaly Brito a indica.
Y den e contexto aki, SEPPA a pidi e minister pa tene cuenta cu e ta representa e accionista mas grandi di Pais Aruba.
“Post NV ta un empresa estatal, un empresa di pueblo y por lo tanto, ta su obligacion pa wak e tema aki y pone mas fondo disponible p’asina por yega na un acuerdo di ahustacion di salario pa e trahadornan”, Magaly Brito a splica.
El a agrega cu di otro banda e minister ta indica cu tin e caso andando y mientras esey ta sosode, e ta prefera di haci nada. “Pa aworaki e lo no haci nada tampoco pa motibo cu na su opinion e ta un empresa cu tin diferente reto, dificultadnan financiero y cu aworaki tin un plan di reorganizacion y a base di esey nan lo wak con por baha e gastonan y hisa un poco e entradanan”, Magaly Brito a duna di conoce. El a agrega cu ora cu esey ta asina leu e mandatario lo mira e oportunidad cu tin si por ahusta of no, pero no aworaki.
“Di otro banda e hecho cu tin un caso na Corte, toch ta un speranza pa e trahadornan cu ora cu nos keda cla e Minister of Post Aruba ta haya e obligacion di cumpli y e minister mes cana e caminda na Parlamento, pa pone mas fondo disponible. Un proceso cu el a declara cu aworaki no ta dispuesto pa cana!” Magaly Brito a remarca.
