Profesionalnan hoben lo duna informacion di nan estudio y carera
ORANJESTAD (AAN) – Señora Yzaira van der Linde, Decano di Colegio Nigel Matthew, den un entrevista cu DIARIO a elabora tocante e prome Mercado di Estudio y Profesion, cu nan a organiza conhuntamente cu Instituto Pedagogico Aruba y Universidad di Aruba.
Nan a invita varios profesionalnan hoben pa bin conta tocante nan experiencia, nan estudio realiza, y e profesion cu nan ta eherciendo al momento aki pa duna e alumnonan di e colegio mas informacion pa despues nan sigui den futuro.
Esaki lo ta awe Diahuebs 16 di November 2023, y lo bay tin dos Sesion. E prome sesion ta di 6:30 pm te cu 7:15 pm. E di dos sesion ta di 7:30 pm te cu 8:15 pm.
Señora van der Linde a duna di conoce cu nan a invita e MAVO scolnan di pariba, y e candidatonan pa examen pa join e evento aki, y tin hopi studiante di MAVO na San Nicolas cu ta desea nan trayecto di HAVO na Colegio Nigel Matthew tambe.
No obstante cu awendia e studiantenan di scol secundario tin hopi informacion accesible, señora van der Linde a reitera cu ta miho ainda si e hobennan ta scucha di esnan riba veld, conta di nan estudio y di e profesion cu nan ta eherce.
E alumnonan a haci pregunta mas concreto tocante kico e profesionnan ta encera pa nan haya mas informacion pa nan por scoge na un manera mas conciente. Colegio Nigel Matthew tin mas di 500 alumno y scol a enfoca mas riba e candidatonan di HAVO-3 cu e aña aki mester scoge na profile, cu nan ta yama nan vakkenpakket.
Tambe nan alumnonan di examen klas, pa despues nan scoge nan estudio sea na Aruba mes of den exterior y esnan di examen klas cu kier haya informacion pa wak kico nan kier haci den futuro. Tambe a invita esnan di e prome klasnan pa motiva nan tambe pa haya informacion y haya sa ki profesion nan kier bay eherce den futuro, y nan ta dispuesto pa traha un tiki mas duro pa logra esaki.
