Colegio Bon Bini a duna un bunita homenahe na Aruba su Frontliners

Minister Dangui Oduber --- ORANJESTAD (AAN): Diabierna merdia Minister di Turismo y Salud Publico a acudi na Colegio Bon Bini den Apollostraat caminda e mandatario a ricibi un homenahe hunto cu e frontliners,

sigui pa un fiesta carnavalesco hunto cu e muchanan. E tabata un rato masha alegre caminda e mandatario a gradici e frontliners. Minister Oduber a comparti cu e muchanan, cu e tambe a bishita e Colegio Bon Bini tempo e tabata mucha.

Frontliners nan presente cu a ricibi homenahe tabata entre otro representante di Bureau Rampenbestrijding, DVG, Polis, Ambulance, ImSan y HOH. Minister a menciona cu e trabou cu a ser haci durante e pandemia tabata un trabou cu a ser haci den ekipo caminda cada un di e frontliners tabata tin un tarea sumamente importante. E mandatario a menciona cu e frontliners a yuda scapa hopi bida. E la duna palabra nan di danki pa tur sacrificio y amor brinda na nan trabou. Awe Aruba a sali di e pandemia y sin duda esaki ta danki na e frontliners.

Minister Oduber a bisa e muchanan, cu nan ta e futuro di mañan.  Pa nan haci nan best na scol, pa dia di mañan nan tin un bon trabou mescos cu nos frontliners.