SANTO DOMINGO: Recientemente President Luis Abinader di Republica Dominicana a pone e prome piedra simbolico pa construccion di e muraya na frontera entre Republica Dominicana y Haiti, na e provincia di Dajabón.
Na e acto aki tabatin varios personahe y tambe politico, kendenan a mustra cu nan ta di acuerdo cu e muraya aki ta wordo crea.
Vice-president di Fuerza Nacional Progresista (Partido FNP), esta Pelegrin Castillo a bisa cu e construccion di e muraya aki na comunidad di Dajabón, ta un muestra cu no tin un solucion Dominicano pa e crisis di Haiti.
“Esaki ta un acto trascendental y historico, y ta manda un mensahe na comunidad internacional cu no tin un solucion Dominicano pa e crisis Haitiano. Esaki ta un frontera cu un pais cu a faya, y esaki ta un principio pa tene control na e frontera, pasobra un pais cu no tin frontera sigur, no tin tereno sigur. Esaki ta un prome paso cu tin di wordo sigui pa hopi mas, pa asina e pais stabiliza su mes,” Castillo a bisa.
Esaki ta esencialmente loke e presidente di partido Pais Posible, esta Milton Morrison a bisa tambe. E ta considera cu e muraya lo bay contribui pa “separa” Republica Dominicana for di Haiti.
“Den un forma hopi claro, President Luis Abinader tabata enfatico riba e asunto aki, y esey ta posicion tambe di partido Pais Posible, esta cu comunidad internacional tin di yuda nan, paisnan manera Merca, Canada, Francia, pasobra e tema Haitiano no ta un problema Dominicano, no tin un solucion Dominicano pa esey,” Morrison a bisa.
E senador David Sosa di Dajabón, a agrega cu e construccion di e muraya ta un comienzo pa regla e control di migracion na e zona di frontera aki.
“E muraya por ta un comienzo pa controla e desorden aki, pero tambe por yuda pa proteccion di animalnan di criadero, y mehora comercio aki na Dajabón,” Sosa a agrega.
Apenas algun dia pasa, Organizacion di Nacionnan Uni a presenta un rapport cu ta mustra claramente cu “Violencia ta sigui pusha Haiti den anarquia y dolor.” Un Haiti unda ley lo no tin nada mas di bisa.
Republica di Haiti a bay den un crisis socio-politico desde Juli cu a pasa, ora cu a asesina president Jovenel Moise. For di e dia ey, varios pandiya di criminal a bin ta mantene control riba cierto sector urbano di e pais.
E extension di e frontera mey-mey di Republica Dominicana y Haiti ta di como 380 kilometer, y segun anuncio haci pa President aña pasa, e muraya lo bay ta double den e lugarnan mas critico di e frontera.
Dajabón ta situa den e parti mas noordwest di Republica Dominicana.
