Varios consumidor ta comenta: - ORANJESTAD (AAN) – Cobranzanan mas halto di coriente, keto bay consumidornan ta hayando.
Diaranzon, hopi ciudadano a haya esun cu tin cu paga dia 14 di Juli proximo, anto e suma ta entre 50 pa 100 Florin mas caro cu di luna anterior, y pa mesun uso.
Tin consumidornan ta controla nan meter di luz y por saca afo cu nan no a gasta mas energia, pero e suma pa paga ta bin mas halto, sin cu e pueblo a worde bisa cu tin aumento di tarifa.
Pa hopi hende un aumento di 50 Florin, ta hopi placa cu mester saca for di e presupuesto pa alimentacion. Corda cu ni salario minimo a bolbe bira 100%, pero entre 20 pa 30% menos, segun ta e doño di trabao. Ta comosifuera cu pueblo tin falta cu Covid-19 a mishi cu Aruba.
Awo falta wak si cobranza di awa tambe ta bin aumenta. Esey den transcurso di siman aki lo haya sa, anto pa famianan kibra cabes kico ta hala atras di alimentacion, pa por cubri e gastonan aki di utilidad.
NOTA DI DIARIO: Tin di remarca cu keto bay e tarifa di coriente te cu awor, ta mescos cu esun desde Januari 2020. Cada luna Oficina Central di Estadistica den su analisis di CPI, tambe ta remarcando cu tarifa di coriente y awa na Aruba no a subi.
Cada cliente tin di check e consumo den kWh pa asina mira si nan mes a gasta demasiado den e luna cu a pasa. Hecho si ta cu e tarifa ta mescos pa casi 1 aña y mey caba.
