Den contexto di prome debate: - ORANJESTAD (AAN) – E otro deseo cu diferente ciudadano a expresa na Mesa di Redaccion di DIARIO,
encuanto kico nan kier mira den Caya Grandi back, ta e apertura di Caya pa autonan, y cu manera tabata originalmente, hopi aña pasa, famianan por a staciona auto y cana den fin di siman, wak vitrina.
Di hende local no a scucha hopi interes den e tram. E tram no a produci ni un debchi preto, pero mas bien mester a haci inversion pa su mantenimento.
Ni un hende por a scucha durante e prome debate un pregunta na e candidatonan pa eleccion, kico nan tin pensa di haci. Deshaci di e tram of dune otro concepto, unda berdad e por genera entrada, pasobra te awendia e ta un parasito, segun diferente opinion.
Encuanto e deseo pa Caya Grandi bolbe habri pa trafico motor, e opinion ta mustra dividi, pasobra Aruba tambe no por bira cara pa modernismo, no obstante tanto hende kier un Caya Grandi cu haya un bida manera den pasado. Tambe mester pensa riba e modernismo pasobra rond mundo, hopi ciudad comercial cu den pasado tabata habri pa trafico, a bira un boulevard riba cual autonan no ta core, pero e publico ta cana trankil, famianan cu yiunan no ta haya preocupacion si e muchanan ta cana los di nan man, of ta hunga riba e caminda. Y alavez por drenta cumpra den tiendanan di tur sorto.
Hulanda ta un ehemplo di esey, pues posiblemente esaki ta algo cu e proximo gobierno lo tin cu evalua, y wak bon kico ta cumbini comercio mas, y como tal e economia di nos pais mas, ya cu manera a splica den un articulo anterior, e solucion di e problema ta den man di e comerciantenan mes pa haci Caya y su productonan mas interesante, varia, y cu prijs ekilibra, y di parti di gobierno resolve e problema di adictonan ambulatorio.
Pues, Caya Grandi sigur a capta hopi atencion di e publico, durante e prome debate, y ta di spera cu awe nochi, esaki lo bira un pregunta pa cada un di tur e 12 lidernan politico, cu otro siman lo ta den e contienda electoral 2021.
