Lo monitor 24/7 desde 1 di juni awo:
ORANJESTAD (AAN) – Crisis Management Office (CMO) a yama un conferencia di prensa, den cual a hiba palabra señor Rodney Tromp di Servicio Meteorologico Aruba y señor Rino Hermans, director di CMO.
Rodney Tromp a cuminza bisando cu nan a yama e conferencia di prensa aki, door cu temporada di horcan 2024 ta cuminza, oficialmente, dia 1 di Juni venidero y ta caba dia 30 di November.
“Loke Meteo por bisa ta cu nos lo tin un temporada di horcan basta activo, mirando e rapportnan di National Hurricane Center y di Colorado State. Nos por bisa cu Colorado State a saca un rapport na meymey di April, anto durante e temporada di horcan e ta aplica e cambionan necesario pa adapta na e temporada di crisis climatico aki”, Tromp a splica.
E pronostico di Colorado State University ta indica cu un average di 14 tormenta ta bira 23, un average di 7.2 horcan nan ta premira 11, cu ta hopi halto caba, horcannan mayor nan ta wak 3.2 nan ta wak 5, y names storm di un average di 69 nan ta wak 115. Pues e number aki ta basta halto pa e temporada di horcan di e aña aki.
Señor Tromp a agrega cu Meteo ta vigila 24/7 cu nan team chikito cu ta consisti di un personal di 8 funcionario, cinco observador, dos meteorologo, dos tecnico. “Cu e team chikito aki nos ta zorg pa manda alerta di manera adecua pa e publico por ta alerta y na haltura kico por haci hunto cu CMO. Nos ta organiza full e temporada aki pa e seguridad di Aruba, y instancianan cu mester wordo alerta debidamente”, Tromp a subraya.
Rodney Tromp a señala cu nos region ta basta cayente aworaki, cu un temperatura di lama ta riba lo normal loke kiermen cu tin basta energia den nos region. El a agrega cu El Niño ta bay switch pa La Niña, y esaki ta bira faborable pa Atlantico y Caribe, pa formacion di horcan of sistemanan tropical.
“Di otro banda nos por bisa tambe cu nos ta trahando hunto cu CMO. Nos tin un planning pa si nos tin menaza nos ta activa di biaha, anto Rino ta coordina hunto cu nos pa nos alerta pueblo debidamente y na ora”, Tromp a reitera.
El indica tambe cu e situacion regional ta wordo monitorea directamente door di National Hurricane Center, y nan ta coordina hunto cu e islanan, pasobra ora tin un menaza pa un Isla, 24 ora prome nan ta yama y coordina hunto cu e directornan di CMO of Meteo pa coordina cu nan.
