CMB a habri su Smart Branch na San Nicolas

ORANJESTAD (AAN): Diabierna mainta Caribbean Mercantile Bank a habri nan asina yama ‘Smart Branch’ na San Nicolas,

cu cortamento di cinta ceremonial y reconocemento na un fundacion y un señora cu ta cliente fiel pa hopi aña.

            Gerente General Paul deWolfe a splica cu for di momento di e pandemia, e banco a haci tur cos pa ta mas cerca di nan clientenan, y pa hunto pasa door di e temponan turbulento di e pandemia.

            Segun deWolfe, e clientenan di CMB a mustra bes tras bes di ta resiliente, generoso y amabel. “Nos ta asina contento di ta un parti chikito di nan bida, y nan famia”, de Wolfe a expresa.

            "E apertura di e branch aki ta un di e oportunidadnan raro cu ta duna nos e oportunidad pa bisa danki, y pa duna bek na e comunidad cu ta traha duro manera San Nicolas”. “Esaki ta mas cu un apertura grandi, e ta un renacimento, y ta mustra cu como un pais, nos ta sigui padilanti hunto y cu cos lo y ta birando miho”, de Wolfe a sigui bisa.  

RECONOCEMENTO Y DONACION

            Natalie de Cuba, Gerente General di Retail di CMB a reconoce sra Carmelita Haynes di Hope Foundation cu ta yuda muchanan den necesidad. CMB presenta sra Haynes cu un big check di 20,000.00 florin.

            Ademas a reconoce Sra. Mary Simon cu ta un cliente fiel di 85 aña di edad, cu tabata e prome cliente cu a bishita e filial aki ora cu e la habri inoficialmente siman pasa. Presente tambe tabata Prome minister Evelyn Wever Croes cu a felicita e banco y a bisa di ta contento cu tin banconan asina cu ta mustra confiansa den temponan asina dificil.