ORANJESTAD (AAN): Recientemente Super Food Plaza Cares Program a haci entrega di un check na valor di Afl. 25.000 na YMCA Aruba.
E check a ser entrega pa marketing manager di Super Food Plaza, Sr. Rudy Richardson y a keda ricibi pa e directora Sra. Mariana Kelly di YMCA.
Tanto Super Food Plaza como YMCA Aruba ta gradici e clientenan di Super Food pa nan donacion. YMCA Aruba ta existi pa mas cu 65 aña ariba nos isla y ta un centro cu ta yuda sostene nos comunidad. Nan tin dos localidad, uno na San Nicolas y e otro na Dakota, caminda cu ta ofrece cursonan, vakantie camp, y programanan despues di skol pa muchanan entre 4 pa 17 aña.
E pandemia a causa cu e fundacion aki a perde un parti substancial di su entradanan y asina a bira hopi dificil pa sigui ofrece tur loke comunidad ta spera di dje. Cu e donacion aki, YMCA ta spera di por sigui brinda tur su servicionan na comunidad.
E ganadornan di luna di Augustus den e campaña Give & Win di e Super Food Plaza Cares Program a resulta:
Shelby Maduro – gift card Afl. 1.000
Jeanine Franken – gift card Afl. 750
Earl Johanns – gift card Afl. 500
Arsan Wester – gift card Afl. 250
Mary-Ann Wong – gift card Afl. 100
Pa participa den e campaña aki, simplemente haci un donacion di Afl. 1.75 of mas na cualkier caha di Super Food Plaza y deposita bo recibo original cu nomber y number di telefoon ariba dje den e tombola. Tur prome dia di luna ta saca 5 feliz ganador. Premionan ta patrocina pa Super Food y tur donacion ricibi ta bai bek pa 100% na comunidad. Fondonan di SFPCP ta ser maneha pa CEDE Aruba.
-------------------------------
