ORANJESTAD (AAN): E narcotraficantenan di Colombia no ta djis busca Republica Dominicana y Puerto Rico so como trampolin pa manda droga pa Merca.
Awor a sali na cla cu nan ta purba nan suerte na British Virgin Islands tambe pa por yega rapido pa Europa.
Den fin di siman, US Coast Guard a baha na Puerto Rico, un cargamento di aproximadamente 1.700 kilo di cocaina cu na a logra intercepta cerca di British Virgin Islands.
E operacion aki a ser haci hunto cu otro agencianan, cu asina a logra intercepta un Speedboat pa confisca e cargamento di droga, cu tin un balor pa e organizacionnan criminal di 51 miyon Dollar.
E accion a socede ora cu nan a sa di stop un Speedboat tipo Go-Fast, segun US Coast Guard a indica den un boletin pa prensa.
E agencia a indica cu durante un patruyahe den oranan di anochi, e oficialnan abordo di US Coast Guard cutter Richard Etheridge, a responde riba detaye cu a detecta un speedboat no identifica den awanan noordwest di British Virgin Islands.
For di nan base na San Juan, Puerto Rico, nan a manda orden pa laga e avion MH60T lanta vuelo for di Base Aereo na Aguadilla pa escolta e cutter te na e speedboat. Ademas di US Coast Guard, autoridadnan di British Virgin Islands a keda den contacto pa intercepta esaki.
Ora esnan abordo di e Speedboat a ripara cu nan a wordo detecta, nan a cuminza benta e bulonan di droga den lama, y a keda huy cu speed halto. Despues un helicopter di US Coast Guard a yuda esnan riba lama pa recupera tur loke a wordo benta na lama. En total a confisca 57 bulto cu tin pakinan di cocaina paden.
Aunke lama tabata hopi bruto, toch a logra di intercepta un cargamento grandi di cocaina y evita cu e ta yega riba caya pa maldiciona hende y yiunan di famianan inocente.
