Clapchi y Mascota: cacho por scucha 4 biaha y pushi casi 10 biaha mas miho cu hende

Nos ta yegando fin di aña y Gobierno di Aruba kier recorda henter comunidad cu no ta tur mascota ta gusta clapchi mesun hopi cu varios di nos.

Zonido duro inespera manera clapchi tira den bario por spanta hasta e cacho y pushi di mas trankilo. Dicon? Pasobra nan oido ta hopi sensitivo; cacho por scucha 4 biaha y pushi casi 10 biaha mas miho cu hende.

 Tin mascota cu durante tiro ta haya bon refugio na cas mes, otro ta logra scapa bay leu for di cas. Tambe tin cacho cu ta gusta clapchi y tin algun di nan cu ta purba hap e clapchi ora e klapchi ta bezig ta kima. Esaki por causa kemadura serio cual ta rekeri atencion medico urgente.

 Pa esey, Gobierno di Aruba cu tin un ministerio encarga cu naturalesa y alabes bienestar di animal en general, ta desea di comparti e siguiente informacion pa bo tene bo mascota safe.

 Refugio cu bo por brinda bo mascota ta pa mantene paden durante tiro di clapchi den un luga sigur. Cende radio of TV pa distrae nan. Keda banda di nan y mantene nan ocupa. Duna nan e extra atencion cu siguramente nan merece.

  Door di su miedo bo mascota por haya un manera di sali toch for di cura pa busca un luga pa sconde di e desordo. Tin algun manera pa sigura cu bo mascota, si e perde mes, e por wordo haya bek. Percura pa bo mascota tin un banchi bisti cu informacion (corecto) unda por localisa su doño. Lo ta hopi bon pa hiba bo mascota veterinario pa e pone un microchip p’e si e no un tin caba.

  Asina bo mascota ta haya un number di identificacion unico pa trace e bek facil si en caso e perde; esun cu hay’e por hib’e veterinario pa controla su number di microchip pa contact bo. Mesora por puntra bo veterinario su opinion tocante calmante pa bo mascota pasobra un calmante mester uza solamente si e ta necesario y den e dosis corecto.

 Por si acaso cu no haya un chens pa microchip bo mascota, zorg pa bo tin un potret recien y duidelijk di bo cacho y/of pushi pa publica si e perde. Si ya caba e tin microchip, update e informacion na bo veterinario por ehempel si bo a muda of cambia number di telefon.