E no kier perde su placa di spaar:-ORANJESTAD (AAN) – Un ciudadano a conta na DIARIO, cu na momento cu su salario a baha cu un porcentahe halto,
na momento cu Covid-19 a bati porta di Aruba, cu ta net momento cu e tabata pasando den un situacion financiero dificil, el a traha un carta pa un compania di seguro unda el a spaar placa durante como cinco aña, cu na prome instancia tabata pa su yiunan, pero cu el a haya su mes den e necesidad di retira e fondonan, pa cubri cierto gastonan urgente, na momento cu su entrada a bira insuficiente.
Esaki a sosode na Maart 2020 mes, pero te dia di awe e no a haya e placa aki di spaarmento, y e mester a recuri na un prestamo cerca un persona conoci, pa e por enfrenta su situacion.
El a yama cualkier cantidad di biaha na e compania, cu tin un voice recorder unda un voz ta bisa cu lo devolve e yamada pero e yamada aki nunca a yega. Kiermen, e tin un aña y tres luna tratando di contacta e compania sin cu por a logra. Siman pasa, el a dicidi di bay personalmente, ya cu durante e pandemia e compania ey no tabata atende cliente personalmente.
Pa su sorpresa, ora el a puntra na e compania pa su placa, nan a bise cu den nan sistema nan tin mas cu un aña di retraso y cu e tin cu sigui warda. E ciudadano ta haya esaki masha desagradable, y hasta e no tin confianza den e compania pasobra e compania no tin derecho di haci wega cu placa di cliente. Awo e ta scuchando di otro personanan cu tambe tin keho di e compania, y cu e no ta confiable, incluso tin hende cu ta studiando e manera con pa hibe Corte.
E ciudadano ta sumamente disgusta y tristo, y financieramente e no tin e recursonan necesario pa paga un abogado, manera e ta worde aconseha. Kizas si tur e clientenan cu a worde defrauda ta uni cabes y conhuntamente lanta un Caso, por ta un Huez por obliga e aseguro ey (negoshi) paga nan clientenan nan placanan di spaar. Y manera ta sosode hopi aworaki, e compania aki tambe ta tira falta riba e pandemia!
