Loke tabata produci mas placa y beneficio pa Pueblo, a bira compania di Estado - *Un Gobierno cu Pueblo a baha por keda activo den companianan di Gobierno? - *Refineria di Aruba mester a produci e debate mas importante pa interes di Pueblo
ORANJESTAD (AAN) — Aruba ta enfrente un eleccion den un tempo historico pa e pais, cu hunto cu Hulanda lo mester sigui crea un futuro.
Nos ta uza e palabranan “sigui crea” pasobra e prome pasonan cu e pais a tuma pa un futuro nobo, tabata durante e periodo di gobernacion tras di lomba, cu tabata marca pa cambio di maneho di placa di e pais pero tambe pa saca Aruba for di man di e fantasia di Citgo y crea un plan structura pa e pais por a sigui cana y yega na e condicionnan cu segun Nacionnan Uni ta necesario pa na 2030 garantisa cu e Arubiano no conoce hamber ni miseria.
Esaki ta encera entre otro cu na 2030 e Arubiano mester por gosa di awa limpi y electricidad cu e por paga y conoce bon comunicacion y transporte.
E acuerdo cu a bira Plan di Gobernacion di Gobierno Wever-Croes, ta sigura cu e Arubiano tin un medio ambiente cu ta evita malesa. Cu e Arubiano tin un economia cu ta sigura su desaroyo y tin un gobierno democratico entre otro.
En corto: e realidad di democracia mester ta bisto na 2030 pa Aruba, cu na 2017 segun cifranan y declaracionnan di Reino tabata na peliger di bancarota mientras cu e proyecto cu mester a crea un crecemento economico di 15 porciento, Citgo, a hoga na caminda pa Aruba.
Den e situacion aki na 2020 Aruba mester a pasa den un pandemia, a sobrevivi y awe ta prepara pa bay vota pa un Gabinete di Ministro, cu hunto cu Gobernador, ta encarga cu e gobernacion diario di Aruba.
Den e desaroyonan cu Aruba a conoce, ta surgi e pregunta, kico a pasa cu e poder di Gobierno cu Pueblo a pone na mando, den loke ta conoci como Compania di Estado, pasobra nan ta propiedad di Pueblo.
Na diferente ocasion DIARIO a hiba su lectornan na e punto cu Aruba a dicidi pa cambia cierto departamento di Gobierno den compania di Gobierno pa asina evita cu politica ta dicidi pa loke ta mas importante pa Aruba y loke ta produci mas placa pa Aruba.
Na caminda pa eleccion, Aruba a entrega un rapport di loke a pasa cu Refineria di Aruba na Ministerio Publico pa mira si esaki ta bira otro motibo pa persecucion penal.
Refineria di Aruba ta un prueba di e peliger cu un compania di Gobierno realmente ta un asilo politico. Ora tuma nota di e fiestanan politico den e compania di Pueblo cu a keda encarga cu asuntonan elemental pa Pueblo, un hende ta puntra su mes kico a pasa cu husticia.
Refineria di Aruba no ta Citgo so. Refineria di Aruba pa medio di otro compania di Gobierno, mester percura tambe pa mercado local di Aruba tin gasolin y otro combustibel.
Pues aki ta trata di un compania cu mester maneha un interes importante di Pueblo mescos cu otro companianan di Gobierno, cu tin un Hunta di Comisario y directornan cu politiconan mester nombra manera na varios ocasion DIARIO a trece dilanti.
No por considera companianan di Gobierno como empresa priva realmente, pasobra den empresa priva un propietario sin mas por yama Polis ora e mira cu su interes a wordo tira na suela. Den empresa priva, medida por wordo tuma como gerencia cu ta actua contra loke mester duna bon resultado pa e empresa y tur cu ta depende di e empresa.
Tin asuntonan di vital importancia cu Aruba mester atende awor. Con e companianan di Estado ta atende cu esaki? Con influencia politico scondi por haci cu pa motibo politico un pueblo no haya loke e por haya y mester mester?
Gobierno di Aruba, cu a basa su maneho riba e acuerdo cu Nacionnan Uni pa mehoracion di calidad di bida di e Arubiano, ta realmente capaz pa garantisa e condicionnan basico di un bon calidad di bida di e Arubiano? Te ki grado cualkier compania di Gobierno pa motibo di color politico, por stroba un gobierno realisa proyectonan cu ta mehora condicion di bida di e Arubiano?
Esaki ta asunto pa pone na discution den debatenan publico pa asina democracia wordo sirbi na Aruba sigur den companianan di Gobierno cu por bira baluarte di un partido politico cu pueblo a rechasa den eleccion.
