Aruba a honra e prome capitan femenino di barco crusero

Cu yegada di Explora I

ORANJESTAD (AAN): Manera cu DIARIO a trece dilanti caba, tabata Dialuna mainta dia 8 di Januari 2024, cu e barco crusero luhoso y nobo, Explora I a bishita waf di Aruba pa prome biaha.  DIARIO a indica tambe cu esaki ta e prome barco crusero cu ta bao comando di un Capitan femenino, esta Capt. Serena Melani.

   E dia aki, representantenan di Aruba Ports Authority, Aruba Tourism Authority, y e agencia SEL Maduro & Sons a subi e barco pa bay duna e capitan y tripulacion un bon bini.

   Explora I ta representa un epoca nobo di viahe luhoso riba lama, cu tin 461 suites cu bista pa lama, tambe penthouse y residences, cu elegancia Europeo y comfort y simplicidad pa enfoca e berdadero “Cas riba Lama” pa huespednan.

   Na e ocasion aki, Cruise Manager Monica Bos di Aruba Tourism Authority, a presenta un plaquette conmemorativo na Capitan Serena Melani na nomber di Gobierno y pueblo.  Capitan Serena Melani cu su experiencia extenso, ta na cabez di e barco y tin e distincion di ta e prome capitan femenino na mundo cu a sali cu un barco for di e dok unda el a wordo fabrica.

   E sector di ‘Explora Journeys’ ta representa e ambicion y soño di hopi tempo cu MSC Group y famia Aponte tin pa crea experiencia luhoso riba lama pa huespednan.

   E barco ta desaroya tecnologianan cu ta yuda crea un futuro mas positivo, y e.o. no ta permiti uso di plastic di un solo-uso riba e barco.