Como parti di AAA Wings of Hope su meta di “Education”:
ORANJESTAD (AAN): Aruba Airport Authority N.V. (AAA) su “Wings of Hope” (WoH) ta orguyoso di por a hasi donacion di 150 voucher pa material y uniform di scol na Directie Sociale Zaken (DSZ) riba Diamars dia 9 di Augustus, 2022.
E aña aki, WoH su metanan ta basa riba e Sustainable Development Goals (SDGs) di Nacionnan Uni y ta inclui proyectonan cu ta cubri areanan manera “Hunger”, “Education”, “Awareness”, “Environment/Sustainable Airport Community”, “Partnership” y “Seniors”.
Como parti di WoH su meta di “Education”, cu ta inclui dos parti, un total di 150 studiante a ricibi asistencia cu nan material- y uniformnan pa scol y mas di 40 studiante lo ricibi asistencia cu nan pago di aña escolar.
Durante e entrega di e vouchernan pa material y uniform di scol na DSZ, WoH su workgroup hunto cu representante di DSZ Sr. Joel Rodriguez a combersa riba e situacion social cu varios famia ta pasando aden den e comunidad di Aruba y e esfuersonan continuo cu ta wordo haci pa DSZ.
Sr. Joel Rodriguez a gradici AAA Wings of Hope pa e apoyo y asistencia continuo pa yuda muchanan pa nan logra nan estudio y na mes momento, WoH leader Sra. Angeline Flemming a expresa su gratitud na DSZ pa nan esfuerso y dedicacion.
