MAICAO: Ehercito di Colombia den coordinacion cu Ministerio Publico, a divulga cu nan a logra rescata na Maicao na La Guajira,
un ciudadano Canades kende a wordo secuestra desde luna di Juli eynan, door di integrantenan di e grupo arma organiza GAO-r comision 41.
Militarnan a prepara e operacion pa asina trece bek sano y salvo e persona aki. E militarnan cu sede na Guajira mes a haci investigacion di inteligencia, y a logra haya sa exactamente unda e secuestradornan tin e Canades aki wanta desde 7 Juli 2022.
Nan a yega di forma sorpresivo riba e lugar, a seya tur rond di esaki. Na e lugar a gara 3 delincuente cu ta forma parti di e grupo criminal. A haya 3 arma di candela di combate, 1 arma di candela chikito, 303 municion, ocho cartucho, y hasta un supresor di sonido pa pistol.
A confisca un pickup y tambe un motorcycle.
E ciudadano Canades a wordo hiba pa examinacion medico, y despues di tur esey el a regresa Canada mesora.
