Minister Glenbert Croes relaciona cu 'blackouts'
*Kier introduci fondo di emergencia
ORANJESTAD (AAN): Minister Glenbert Croes a expresa den entrevista cu DIARIO cu e ta comparti e dolor di comunidad ya cu e 'blackouts' ta tumando lugar di mas. "Nos tambe ta compronde sin ta un tecnico cu lo por tin problema den full e proceso pa un planta cu WEB a inverti 240 miyon florin, sin bo inclui e meerwerk. Anto e ta nobo nobo supuestamente".
Tur cos a wordo haci pa e wordo introduci exitosamente y cu den e transicion por tin un par di problema, esey ta comprendibel. Pero asina hopi frecuente. Tres of cuatro biaha caba, esey ta lanta un 'red flag', e mandatario a indica.
El a agrega cu como Minister encarga cu Utilities, WEB y Elmar a exigi un investigacion independiente y un audit di un compania di renombre internacional unda cu un compania grandi manera Wärtsilä no por tin influencia pa por haci un investigacion pa no solamente haya sa e berdad, pero pa bisa kico por haci pa evita e 'blackouts' aki.
E mandatario a condena cu un 'blackout' ta bin sosode net riba un dia caminda economia di Aruba ta den 'full swing' y cu uzo di tecnologia moderno e cosnan aki no por pasa asina frecuente.
El a bisa cu mescos cu e ta defende Utilities, WEB y Elmar mester ta auto-critico tambe pasobra awa y coriente ta caro, pero kier mira cu e servicio y e contra prestacion di e companianan di gobierno ta segun deseo di comunidad.
"E Blackouts aki ta haci daño cu consecuencia financiero na henter nos pais pa locual nos mester impedi pa esakinan tuma lugar", a expresa.
Croes a agrega cu e idea cu ta pensando riba dje ta pa introduci un fondo di emergencia pa yuda pueblo pa loke ta e dañonan cu ta wordo ocasiona.
A manifesta cu e no kier kere cu e cosnan aki ta tuma lugar den forma intencional. "E ora, e dia, e timing tabata perfecto pa bo haci un pais, un comunidad, un economia hopi dolor".
