Ceremonia di traspaso oficial di edificio di ex-DOW pa Aruba Ports Authority

Ministro Dangui Oduber presente tambe

ORANJESTAD (AAN): Diahuebs anochi tabata un ocasion hopi importante unda a celebra e ceremonia di firmamento pa traspaso y restauracion di e edificio di ex-DOW na Playa.

   Minister di Turismo y Salud Publico sr. Dangui Oduber a atende e ceremonia di traspaso oficial di edificio di ex-DOW na skina di Paardenbaaistraat y Lloyd G. Smith Boulevard pa Aruba Ports Authority (APA).  Esaki sigur ta un logro historico pa Aruba Ports Authority pa por a logra cumpra y restaura un bunita momumento cu hopi caracteristica y historia den e curason di Oranjestad.

   Den e ceremonia protocolar, Gobernador Alfonso Boekhoudt y varios mandatario tabata presente pa presencia e momento historico aki. E proyecto di restauracion di edificio di ex-DOW ta marca un paso significativo pa mehora e infrastructura y servicio cu ta worde ofreci na tanto localnan como turistanan.

   E edificio ta situa central den centro di ciudad, e ta e prome impresion cu turistanan crucero ta haya ora nan sali for di nos terminal crucero y miles di turista y local ta pasa dilanti e edificio aki tur dia.

   Minister Dangui Oduber su vision y maneho den turismo ta basa riba keda haci inversionnan continuo den producto Aruba. Finalmente, Minister Dangui Oduber ta contento cu despues di un proceso largo ta marca un fecha importante na mei 2023 unda a firma MOU entre partidonan pa asina sondea e posibilidadnan pa APA cumpra e edificio for di Land Aruba y net 1 aña despues ta finalisa un fase importante cu ta e traspaso oficial di e edificio pa asina cuminsa prepara e siguiente fase cu lo bira e ehecucion di e bunita proyecto di restaura e edificio.

   Minister Dangui Oduber ta gradici henter e team di ministerio di turismo cu a traha incansablemente riba e proyecto y sigur un danki special na management di APA, board di APA, ATA y DOW y Monumentenbureau pa hunto por bay realiza un hoya di proyecto pa Aruba cu nos tur por ta orguyoso di dje. Nos tin un futuro briyante nos dilanti y loke nos mester ta conserva nos libertad pa sigui desaroya nos pais manera nos mes ta deseya esaki.

  Minister Dangui Oduber aki a expresa: “Bo mester por tin e vision y tambe na mes momento e conviccion y curashi pa por tuma e decisionan corecto pa bienestar y progreso di bo pais.”