WILLEMSTAD: Tabata Diabierna anochi laat pa 11:45 pm, cu Central di Polis na isla di Curaçao a ricibi yamada
cu na un adres Reigerweg (Cas Cora) bisiñanan a tende un dama ta grita pa yudansa. Mesora a dirigi un unidad policial na e lugar.
Na su yegada, agentenan a bin topa personal di Ambulans tratando un victima masculino kende a ricibi tiro for di un arma di candela.
Continuando cu e investigacion a bin sali na cla cu e ciudadano aki tabata sinta cu su pareha den balcon patras di nan cas na momento cu nan a tende un zonido.
E ciudadano a lanta bay wak ta kico y djis un ratu despues e dama a tende un tiro. Mesora despues el a worde sorprendi pa tres homber desconoci den cas di cua uno di nan cu cara tapa y cu handschoen bisti, a bini riba dje.
Bao di menaza cu arma di candela, e homber aki a obliga e dama habitante pa entrega placa y yabi di auto.
Despues di a busca rond den e cas, e hombernan aki a bandona e cas cu e auto di e victima.
Ta un auto compacto Chevrolet Beat (similar cu Chevrolet Spark) color orañe cu number B/36-0.
Personal di Ambulans a trata na reanima e victima, pero sin e resultado desea. Na e cas mes algun rato despues,
Docter di polis a constata morto di e homber Antonius Johannes Maria Hendrica Brood, di 49 aña di edad, naci na Hulanda.
E victima aki ta un oficial di polis pa Marechaussee Hulandes, pues e ora autoridadnan Curasoleño a notifica e oficialnan hudicial militar pa nan tambe bin haci nan investigacion.
Polis di Curaçao ta considera e caso aki uno hopi serio y brutal.
E morto di oficial Brood a cay fuerte entre su coleganan di Koninklijke Marechaussee.
Polis ta pidi comunidad pa duna tip si nan tin detaye riba loke a socede.
