Celebracion di 10 edicion di Kids & Teens Christmas Song Festival 2022

ORANJESTAD (AAN): Tur cos ta cla pa awe diasabra 5 di November, den Cas di Cultura pa tur hende bisti di gala y

celebra e di 10 edicion di Kids & Teens Christmas Song Festival, cu ta conta cu un total di 30 participante di cual tin 2 duo.

E aña aki Kids & Teens Christmas Song Festival ta celebrando su di 10 y ultimo edicion di e festival di Pasco na Aruba pa mucha y hoben. E festival ta cuminza 2:00 pm y pa 5:15 pm  Katatumbo lo presenta y despues nos lo saca resultado di e festival.

Manera tur aña por tuma 30 participante, 10 participante den cada categoria cu cancionnan di Pasco na Papiamento.

E aña aki e di 10 edicion di Kids & Teens Christmas Song Festival lo ser dedica na Katatumbo pa nan aporte y dedicacion na e temporada dushi di fin di aña pa hopi.
Tur participante ta wordo acompaña pa e mesun All Star Band di e festival bao encargo di Sr. Danny Koolman.

Tin 3 categoria cual ta: 04 pa 07 aña; 08 pa 11 aña y 12 pa 17 aña.

   Un atardi cu ta priminti di kibra tur expectativa unda e talent di nos muchanan lo resalta.

   Mester menciona cu hopi cantante hoben cu ta participando y destacando den festivalnan nacional manera entre otro den Festival di un canto na nos Himno y Bandera, Festival di Dande y otro festivalnan, ta cantantenan cu a debuta pa prome biaha den Kids & Teens Christmas Song Festival.