Cede Aruba su WAW Mobiel 'Wega Ariba Wiel” ta bek

ORANJESTAD (AAN0:  WAW Mobiel lo ta bek den barionan di Aruba cuminsando Dialuna 19 di februari 2024.

            Ta na cuminsamento di 2023 CEDE ARUBA a acerca stichting Jantje Beton di Hulanda pa asina sondea e posibilidad pa haci un speelscan pa Aruba. Un idea cu a origina door di e programa nobo di CEDE ARUBA, Barionan UNiCO. Durante 4 luna den 2023, a start cu e programa piloto aki unda cu a pasa den algun barionan hunto cu IBiSA, FCCA, polisnan di bario y CEDE ARUBA.

            Por mira bek riba un resultado hopi positivo unda cu e meta principal tabata pa haci movecion y aumenta participacion di e muchanan den bario. Meta principal tabata pa duna e hoben oportunidad pa experencia deporte y movecion en general door di haci actividadnan structura.

            A haci uso di localidadnan na Village, Cura Cabay zuid, Bushiri complex y na Eagle Beach. E team di instructornan hunto cu polisnan di bario a haci un tremendo trabou dunando e confiansa y atencion cada bez na e hobennan cu tabata warda for di tempran pa e WAW Mobiel yega pa nan por haci un deporte, movecion of reta nan mes cu e diferente actividadnan.

             E cantidad di hobennan tabata varia pa siman den e diferente barionan. Tabata un satisfaccion pa por a mira e interes tabata subi den algun di a barionan y segun raport, un total di casi 300 mucha, durante e 4 lunanan, reparti den e barionan, tabata pendiente pa e WAW mobile.             E muchanan a pidi pa bin cu mas tipo di deporte of otro tipo di actividad y si por a añadi mas ora, mirando cu tabata 1 ora so WAW Mobiel tabata tey den bario. E presenta e deseo akin a stakeholders y asina tanto CEDE ARUBA como IBiSA a bay di acuerdo pa cuminsa acerca mas partnernan Deportivo pa trece mas deporte y actividad den bario y pa keda te 7 or p.m.

            CEDE ARUBA a bestel materialnan for di Hulanda cu pronto lo wordo incorpora den e WAW Mobiel. Tin di remarca cu e exito di e programa sigur ta door di e interes di mesun hobennan cu ta pidi pa mas oportunidad pa haci weganan den bario y cu e instructornan capacita cu ta yega cu animo den e WAW Mobiel pa ehecuta e actividadnan. CEDE ARUBA a mira e interes y a dicidi pa sigui cu e proyecto aki pa 6 luna mas den 2024. E planificacion y ehecucion ta cla pa start y a pone un bario acerca cu ta Dakota.

            Aki tin e schedule di WAW Mobiel durante siman :

Dialuna – DAKOTA – Localidad Centro di Bario Dakota – Basketball veld.

Diamars – VILLAGE  -  Localidad Basketball Veld Village

Diaranzon – BUSHIRI – Localidad futbol Turf Bushiri complex FCCA

Diahuebs – Cura Cabay Zuid – Localidad futbol Turf CCZ FCCA complex

Diasabra lo cambia cada diasabra entre San Nicolas cu Eagle Beach.

Orario ta di 5:30 – 7:00 di atardi.

Tur mucha ta welcome durante e atardi nan den bario.

            CEDE ARUBA ta hopi contento pa anuncia cu awor e muchanan por bira miembro (gratis) y lo ricibi un carchi di presencia y na final lo por gana un premio pa e hoben cu mas ta atende na evento di WAW Mobiel den su bario. Un danki sigur na IBiSA, FCCA Polisnan di bario pa a kere den e proyecto aki y cu semper hopi entusiasmo a dedica na nos muchanan di bario.

Dialuna 19 di februari WAW mobiel ta bek den barionan di Aruba.