Un politico no por tin mas peso cu otro ciudadano den caso di investigacion - *Husticia mester demostra cu Benny no tin preferencia riba otro sospechoso - *Otro sospechosonan a pasa mas tempo cu Benny detencion preventivo
ORANJESTAD (AAN) — E palabra “detencion” ta mustra riba un situacion den cual bida personal di un persona ta sufri cambio.
“Detene” of “aresta” ta papia di descontinuacion di por ehempel loke segun democracia ta normalidad, cu ta encera cu un hende ta liber pa dicidi kico e ta haci, unda e kier bay y kico e kier haci cu su tempo.
Un proceso of situacion ta wordo descontinua cu ta loke ta pasa tambe na momento cu autoridad, a base di un leynan sumamente estricto den un sistema democratico, interveni den bida di un persona.
Uno di e puntonan cu mas ta bini dilanti den e desaroyonan di e caso “Avestruz” ta e hecho cu Benny Sevinger tabata sa for di 2019 cu e ta wordo investiga.
E prome parti di e investigacion oficial den asuntonan di tereno di gobierno a cuminsa y a duna muestra cu autoridad mester a determina si Benny Sevinger como Ministro a beneficia cierto personanan y a atende asuntonan di tereno di Pueblo contra ley.
Por papia aki pues di accion oficial pa determina si Benny Sevinger a haci mal uzo di su cartera como Ministro y a practica corupcion e palabra cu ta mas comun ta bisa y cu si manera autoridad a presenta awor, e tabata parti di un organisacion criminal.
E ultimo dos palabranan aki ta tipico pa casonan manera Avestruz pasobra ta papia aki di operacionnan contra ley den cual no ta solamente un persona ta envolvi.
Si un persona drenta cas di otro pa horta, e ta wordo persigui pa un acto criminal. Un persona cu ta bende droga of producto horta por ehempel, ta parti di un operacion criminal pasobra ta un grupo di persona ta envolvi.
Crimen organisa tin un peso grandi pasobra sigur ora Pueblo ta wordo perhudica directamente, abuso ta wordo haci di posicionnan exclusivo den un comunidad.
Por mira cu for di e momento cu autoridad a cuminsa actua contra Benny Sevinger, su partido a cuminsa protesta y a acusa autoridad na forma serio.
Por papia pues di un situacion, caminda politica ta pone presion pa influencia un proceso legal. Di e forma aki tambe mundo politico ta pone imparcialidad di husticia na prueba.
Autoridad no por hala atras pasobra e persona cu ta wordo sospecha ta un politico. Husticia na Aruba ta basa riba democracia y husticia na Aruba mester ta ciego.
Por mira cu e personanan cu a wordo deteni den e caso aki, y cu den nan mayoria ta pertenece na e partido politico di Benny Sevinger, a keda pa basta dia priva di nan libertad den detencion preventivo.
Awe eleccion ta yega mas cerca pero esaki segun Leynan di Aruba no por evita cu ley ta wordo cumpli of cu un trato special di cualkier forma, ta wordo duna na Benny Sevinger.
Si Benny Sevinger a wordo trata diferente for di personanan den loke ta crimen organisa (pues di un grupo) segun autoridad ta sospecha, no por trata Benny diferente na otro detenidonan den e caso aki cu tambe a perde nan libertad pa basta tempo y asina a sufri resultadonan den nan bida tambe.
E caso Avestruz a pone Husticia di clase na prueba. Pasobra Benny ta Ministro e no por ta sospechoso of mester haya un trato preferencial? Leynan no ta permiti esaki pero si ta permiti pa Husticia tuma medidanan pa seguridad personal di Benny den prizon por ehempel.
Democracia ta un palabra grandi, cu continuamente ta wordo poni na prueba. Democracia ta keda simplemente: “ley pa uno y ley pa tur”!
