ORANJESTAD (AAN): Gobierno di Aruba oficialmente a presenta e situacion actual di recuperacion economico.
Turismo te na e momentonan aki ta recuperando danki na e gran cantidad di turista cu a bin Aruba den e ultimo tempo.
Luna di Mei a mira 70.000 turista cual ta un bon cantidad, sinembargo ainda no a yega 100%. Na e momento aki nos ta na 55%. Si e tendencia aki continua, lo cera e aña cu un recuperacion di 68% di nos turismo.
Diaranson ultimo tabatin e prome barco crusero desde 15 luna pasa. E fecha 13 di maart 2020, e mesun fecha cu a constata e prome dos casonan di COVID-19 na Aruba, tabata e ultimo biaha cu tabatin un barco di crusero cu a yega Aruba y sali for di nos waf cu turista abordo.
Siman pasa ora cu e barco crusero a yega tabata un momento di emocion pasobra na momento cu a cera frontera no tabata sa ki dia lo bay back na normalidad. Aworaki por bisa cu poco poco ta mira esaki.
Pa por a yega na e punto aki tin hopi protocol entre otro, hendenan cu ta vacuna so por ta abordo y nan ta haci test regularmente. Asina a constata cu despues cu e barco a sali for di Aruba, tabatin dos persona asintomatico cu tabata positivo. E personanan aki no tabatin ningun sintoma y pues cu chens minimo di pega un otro persona.
Premier Wever-Croes a splica cu mes ora e protocolnan a worde aplica pa minimalisa e riesgonan cu lo contribui na e exito cu turismo crusero por trece pa Aruba back. E barco lo bolbe Aruba cada dos siman y cu esaki por bisa cu ta cuminsa back cu recuperacion riba e area di turismo crusero.
Personanan ricibiendo subsidio y pakete di cuminda:
Apesar di e bon noticianan aki, Aruba no ta na 100% di recuperacion turistico. E realidad ta cu tin 4000 persona cu a perde nan trabao duante di pandemia y cu ta ricibi Fase pa nan por purba yega fin di luna y cumpli cu nan gastonan. P’esey no por bisa ainda cu e crisis ta tras di lomba. Apart di esey 14.000 persona cu ta traha den sector priva ta depende di e subsidio di salario cu Gobierno ta duna e doño di trabao (loonsubsidie).
Consecuentemente no ta tur hende ta cobrando 100% di nan salario ainda. Varios hende ta cobrando 60% ainda como cu segun doño di trabao ta pa motibo cu nan no a recupera completamente ainda.
Ademas, 1 den cada 5 ciudadano di nos Pais ta depende di pakete di cuminda di Cruz Cora cu Gobierno di Aruba y Fundacion pa nos Comunidad ta tuma over otro luna.
Contribucion sector publico y semi publico:
Pa locual ta e contribucion di solidaridad cu a pidi sector publico, tambe ta mira luz na final di e tunnel si e tendencia di crecemento economico continua. Continuamente ta evalua cuanto persona ta den Fase, Loonsubsidie y cuanto ta depende di pakete di cuminda, pa asina determina e momento cu por cuminsa kita e cortamento di salario riba empleadonan publico y semi publico y bay back na 100% salario, Prome Minister a splica.
E realidad ta cu Aruba ta recuperando y enfoke di Gobierno ta riba e crecemento y pa crea mas cupo di trabao pa esnan cu a perde trabao, pa esnan cu no tin trabao y esnan cu kier otro trabao. Trabao cu salario digno pa trece stabilidad riba area laboral. Tin diferente desaroyo andando riba e area turistico, entre otro e proyecto di hotel na San Nicolas Secrets cu ta den acuerdo di ROP/ROPV. Tin mas desaroyo den colony y tambe negociacion andando pa loke ta e refineria. Banda di esaki tambe tin desaroyo na playa pa loke ta edificionan di Gobierno.
Pa resumi Premier Wever Croes a bisa: ‘Diescinco luna pasa tabata e prome biaha cu a constata COVID-19 na Aruba. Mi tabata para tur anochi na television pa trece informacion y mantene e animo na halto. Mi tabata bisa: “This too shall pass”, Aruba a enfrenta retonan hopi grandi den pasado y a sa di sobrepasa nan. Awe por bisa cu hopi emocion y cu gran orguyo: “This too is passing”. Aruba a uni den e forsa, amor y stimacion cu tin pa nos pida baranca y enfrenta e retonan di mas grandi di e pandemia cu awe nos por bisa cu ta sobrepasando nan.
Ta duna danki na tur esnan cu a duna di nan parti pa Aruba ta unda cu nos ta para awo: frontliners, ciudadanonan, crisisteam y profesionalnan den Gobierno.’
