Pa colmo tin beslag sospechoso riba loonsubsidie tambe - ORANJESTAD (AAN): Un disgusto enorme ta reina bao di actual empleadonan di Aruba Airlines,
y nan ta sintiendo nan mes pusha den un skina sin salida, y tin di haci varios triki e dianan aki pa por pone pan riba mesa pa nan famia.
Informacion cu DIARIO ta dispone di dje, ta cu te cu Diamars atardi 15 di Juni 2021, ainda ningun di nan a haya salario pa luna di Mei 2021. Esaki tin varios empleado hopi desespera, pasobra desde aña pasa nan salario mensual ta bin a base di subsidio di salario via SVb. E ultimo biaha cu nan a ricibi e 60% di pago tabata fin di April. Nan tin 1 luna y mey caba sin cobra nada mas.
E MOTIBO: Lo mas insolito ta e motibo pakico nan no a haya salario. A haya sa cu un piloto femenino local cu ta empleado pues, a hiba e Aerolinea dilanti Huez, y como cu e no kier a yega na un areglo pa ricibi pago, el a dicidi na pone beslag riba e placa di loonsubsidie. E empleado a entabla caso den Corte, despues cu e aerolinea a dune su retiro.
Debi cu tin beslag riba nan Loonsubsidie, ningun otro di e 80 pico empleado di Aruba Airlines por a haya salario na fin di Mei 2021. Awor ya ta drentando e di tercer siman di Juni, y te ainda nada.
Varios trahador a cuestiona con por ta posible cu Corte ta permiti pone beslag riba Loonsubsidie, siendo cu esaki ta un placa individualmente ‘earmarked’ door di SVb pa cada empleado cu a firma e lista. Pues e placa di ‘Loonsubsidie’ no ta placa di e Aerolinea! Ta placa cu Gobierno via di SVb ta dirigi un suma exacto pa cada empleado individual.
Ademas nan no ta haya nada bunita cu un colega ta haci esaki, perhudicando decenas tata y mama di famia net den e periodo dificil aki di pandemia.
LEGAL OF NO: Pero aparentemente for di luna di Mei caba a base di resultado di caso den Corte, e empleado a manda un mensahe pa Aruba Airlines, esta cu si e no haya pago, e lo pone beslag fin di luna riba e Loonsubsidie.
Ta increible pa mira cu riba 15 di Juni 2021, ainda e compania no por resolve e situacion. Hopi di nan ta cuestiona di con SVb mes no a mete den e asunto aki pa mustra Deurwaarder cu e placa ey no ta di compania, sino di empleadonan.
E empleadonan a tende di compania Diabierna pasa, pero no por sigura nan si ta bay haya pago di salario e siman aki. Pero aworaki empleadonan ta bibando malo, unda tin di hasta fia placa aki-aya di demas famia pa asina por cria nan yiunan. Y nan ta desapunta cu e aerolinea ta reacciona asina poco-poco riba e asunto aki.
Ta comosifuera cu Aruba Airlines no ta ni preocupa cu e empleadonan tin mas di 45 dia caba sin haya salario.
Pero empleadonan nan animo ta hopi abao, tratando di sobrevivi aki-aya pasobra no tin otro forma di haci. E urgencia cu Aruba Airlines mester traha riba e asunto aki no ta wordo demostra. Tin biaha nan no por ni haya yudanza legal, pasobra aparentemente no a haci pago na abogadonan.
Empleadonan ta entregando 40% di nan salario desde comienzo di pandemia, y pesey mes nan poder financiero tabata basta abao, y awor pa colmo ta bayendo pa dos luna cu no ta hayando entrada.
Con ta cu e futuro di e compania? Empleadonan mes no ta haya ningun clase di update ni informacion kico e plannan ta pa bolbe start cu vuelonan. Recien diripiente un Airbus a yega e isla cu solamente parcialmente e emblema di Aruba Airlines poni riba dje. Algun luna pasa a tende cu kizas na Juni 2021 lo cuminza bula, pero aworaki ya ta Juni y ni empleadonan por haya loonsubsidie cu a bay ‘perdi’ den beslag.
Ainda tin decenas di hende cu tin Pasashi cumpra di comienzo di 2020 cu keto bay tin esaki warda, sperando cu un dia den futuro nan lo por usa e pasashi bek.
