Casi 30% di turistanan no ta keda den Hotel sino den ‘vacation rentals’

Januari 2023 a mustra di ta mas fuerte cu januari 2022 y januari 2019

ORANJESTAD (AAN): E siman aki, Direccion di Turismo di Aruba a duna un relato ora di compara resultado di Januari 2023 compara cu 2019 y tambe 2022.

   Den luna di januari 2023, destinacion Aruba a ricibi un total di 98,942 bishitante “stay-over”. Si compara luna di januari 2023 cu januari 2019 - cu tabata e ultimo aña normal di turismo, por mira cu Aruba a recupera 105% di locual a worde ricibi na januari 2019, cu ta indica un crecemento di 5%.

   Si compara januari 2023 cu januari 2022 por wak un recuperacion di 166% cu ta indica un crecemento di 66%.

   Mercadonan y categorianan di acomodacion:  Den luna di Januari 2023 82.8% di e total di e bishitantenan “stayover” pa Aruba a bishita for di Norte America, 6.6% a bishita for di Europa, 8.4% a bishita for di Latino America y 2.1% tabata procedente di otro partinan di mundo.

   Mirando e categorianan di acomodacion, den januari 2023 36.1% di bishitante a keda den hotelnan High-rise, 8.1% a keda den hotelnan Low-rise, 26.1% a keda den Timeshare y 29.8% a keda den otro tipo di acomodacion, conoci tambe como vacation rentals.

   Vacation rentals: Ta importante pa menciona cu A.T.A. tin acceso na un plataforma unda por wak e cantidad di cas, apartamento y villas cu ta worde uza como vacation rentals como tambe e prijs promedio pa anochi, e ocupacion y un calculacion di e entrada cu esakinan ta genera.

   Si compara januari 2023 cu januari 2022 por wak cu e prijs averahe di e acomodacionnan aki a crece cu 15%, for di un prijs promedio di $236 pa anochi na januari 2022 pa un prijs averahe di $271 na januari 2023. Si compara januari 2023 cu januari 2019, por wak cu e prijs averahe di e acomodacionnan aki a crece cu 43%, for di un prijs promedio di $189 pa anochi na januari 2019 pa un prijs promedio di $271 na januari 2023.

   Si compara januari 2023 cu januari 2022 por wak cu e ocupacion averahe di e acomodacionnan aki a crece cu 7 punto di porcentahe, for di un averahe di 61% na januari 2022 pa un averahe di 68% na januari 2023. Si compara januari 2023 cu januari 2019 por wak cu e ocupacion averahe di e acomodacionnan aki a crece cu 3 punto di porcentahe, for di un averahe di 65% na januari 2019 pa un averahe di 68% na januari 2023.

  Den caso di entrada, si compara januari 2023 cu januari 2022 por wak cu e categoria a genera un crecemento den entrada di 42%. Si compara januari 2023 cu januari 2019 por wak cu e categoria a genera un crecemento den entrada di 195%..

   Encuanto aña 2023:  Pa 2023 ta sigui uza 4 indicador pa midi turismo. Compara cu 2019, na 2023, ta premira cu cantidad di bishitante lo recupera 105%, entrada di turismo lo recupera 117%, entrada di cambernan di hotel segun cifranan di AHATA lo recupera 100%, cantidad di bishitantenan crucero lo recupera entre 90% y 100%.