Cas Veneranda renoba lo bay tin panelnan solar tambe

Trabao di renobacion a start

ORANJESTAD (AAN): Diamars atardi net prome cu bahada di solo, a tuma lugar un ceremonia special den Wilhelminastraat, na e edificio di ‘Cas Veneranda’, cu den pueblo ta conoci tin biaha como ex-Papiamento Restaurant.

   Den su discurso, Ministro Geoffrey Wever a splica cu e renobacion di Cas Veneranda lo brinda no solamente espacio nobo pa oficina pero tambe lo ta ekipa cu panelnan solar pa reduci e gastonan mensual di coriente, aire condiciona eficiente y insulacion, y tur esakinan necesario pa transforma e edificio den uno mas sostenibel y “environmentally friendly” posibel. Adicionalmente, lo tin un espacio pa huur pa un restaurant, y tambe lo tin area pa reunion y conferencia.

  Durante ultimo lunanan, trabaonan preparativo a ser ehecuta den preparacion pa e restauracion, poniendo gran enfasis riba conservacion di e integridad structural y e balor historico di e edificio.

  Minister Wever ta subraya cu e reubicacion di e departamentonan di gobierno pa e centro di Oranjestad ta un di e strategianan pa yuda atrae mas bishitante durante oranan di oficina, y di e manera aki, ta beneficia e establicimentonan comercial den e bisindario tambe. Durante su discertacion, Minister di Asunto Economico, Comunicacion y Desaroyo Sostenibel, Sr. Geoffrey Wever, a enfatisa cu e proyecto aki ta un paso importante den e plan di revitalisacion di Oranjestad.

   Na e ceremonia tabatey presente e nieto- y bisanietonan di e doñonan original, esta Federico ‘Machi’ Arends y Maria Veneranda Arends-Lacle.  Ministro a tuma un mokkel den man hunto cu esnan di Monumentenfonds pa asina cuminsa basha pida muraya pa simbolisa comienso di e trabaonan.  Tambe tabatin acto di firmamento eynan mes.