Sharline Koolman di DVG: - *Haci bo afspraak y vacuna awor cu no tin lista di spera!
ORANJESTAD (AAN): Siman pasa Aruba a ricibi un lote di mas cu 12 mil vacuna Pfizer. Sinembargo, Departamento di Salud tambe ta conta cu un cantidad di e vacuna di Johnson & Johnson (J&J) ainda.
Sharline Koolman di DVG a splica cu e tempo ey a haya 12.500 vacuna y hopi di dje no a wordo uza pasobra tin cu pidi p'e y haci afspraak.
E ta menos dificil pa deal cu ne pa motibo cu e no ta wordo gefrozen. E ta wordo gewoon warda na un temperatura cu por uza mas facil. Pero e persona cu kier e vacuna aki tin cu pidi p'e.
No tin hopi hende cu a pidi e vacuna di J&J. Ta 6 pa 7 persona mester por haya e vacuna na mesun momento pasobra no por tira e resto di vacunanan afo. Pesey mester tin un cantidad di hende cu kier uza e vacuna aki, a remarca.
Koolman a laga sa cu na Aruba no tin hopi pedido pa e vacuna aki. Pero si tin hende interesa mester pidi p'e.
El a agrega cu mas o menos 2 luna pasa el a pidi comunidad pa vacuna pasobra pais Aruba a hinca hopi placa den centronan cu a pone disponibel, entre nan Sport Hall na Santa Cruz caminda cu cierto momento a pasa eynan y a topa cu e trahadornan sinta ta warda e hendenan pa bay vacuna.
E tempo ey a bisa caba cu si no bay vacuna e momento ey lo bay yega un momento cu tin cu bay warda pa haci un afspraak pa yega na beurt. A yega e momento ey, y aworaki no por keda 'babysit' ningun hende mas.
Pueblo a wordo avisa y si aworaki un hende ta realisa mirando e cifranan actual cu Covid ta yegando cerca, e conseho ta pa haci un afspraak.
Aworaki tin un capacidad pa por vacuna mas o menos entre 800 pa 1000 hende pa dia. Pero locual tabata tin siman pasa tabata 400 hende cu a bay vacuna di un dia pa otro. Capacidad tin, a splica.
Ta stimula tur hende pa vacuna aworaki cu no tin lista di spera. Pero si bo ta mira cu e cifranan aki ta subiendo y si ta siguiendo noticianan internacional por mira cu hopi hende cu no a kere den vacuna y a wordo hospitalisa, a pasa e susto di nan bida, cu ta hendenan rond di 30 pa 40 aña, nan ta conta nan storianan y nan mes ta stimulando nan amigonan cu nan mes a bisa nan pa no vacuna. Awor nan mes ta bisa e amigonan pa mihor bay vacuna pasobra e cos aki no ta un joke, Sharline Koolman a expresa.
"Haci uso di e experiencia ey por fabor bo por haci bo afspraak ainda. Haci uzo di esaki. Baha e Health App y si bo no por hacie pasa na Departamento di Salud (DVG), nan lo por yuda bo cu esaki. Registra bo mes", a bisa.
Aworaki no tin lista di spera, pero si esey bin, esnan cu kier vacuna lo mester bay warda nan beurt.
Koolman a enfatisa cu e 12.500 vacuna cu Aruba a caba di haya no por bay keda warda den un freezer. Nan mester wordo uza. Tin hopi parti na mundo cu ta leu di sikiera ricibi vacuna y corda pa aplica esakinan.
Caribe mes tin un problema hopi grandi. Tin paisnan cu no a yega ni 5 of 6 porciento ainda di nan poblacion vacuna. "Dus, abo tin e luho na Aruba pa haci esaki. Nos ta ofrece bo e, y bo no ta paga p'e. Ta simplemente bo tin cu yega pa hay'e", e Crisis Team Leider a manifesta.
