Golpi duro na narcotraficantenan di La Guajira - ORANJESTAD (AAN): Autoridadnan combina di diferente instancia na Colombia,
a uni forza riba Diabierna pa asina a coordina un accion riba lama, unda na final a logra di captura un di e cargamentonan di mas grandi ultimo temponan aki.
Nan a intercepta e cargamento aki na un distancia di 60 km noordoost di Puerto Bolivar na departamento di La Guajira (Colombia). E area unda a haci esaki, ta exactamente 165 kilometer pabao di Arashi Beach di Aruba.
E ta un golpi duro na e gruponan criminal organiza cu ta transporta y bende droga. E biaha aki nan careda di bina a wordo para door di Policia Nacional, Forza Aereo, Ehercito Colombiano, y tambe Ministerio Publico Colombiano.
Tur cos a cuminza ora cu un unidad di Forza Aereo Colombiano cu tabata bulando entre Puerto Bolivar y Bahía Honda, a detecta un speedboat tipo GoFast moviendo sin ningun identificacion riba lama poco panort di Bahía Honda. Bahía Honda ta na e parti mas noordoost di Colombia.
Tabata mira cu e speedboat aki ta rumbo pa noordoost, pues ta tratando di bandona awa Colombiano pa bay sea e islanan ABC, of kizas pa costa Venezolano, of kizas pa sea Republica Dominicana of Puerto Rico.
Cu urgencia a coordina cu demas instancianan cu a manda patruyero pa intercepta e speedboat aki cu e ora ey ainda tabata den awa teritorial di Colombia.
Ora e speedboat GoFast a detecta cu autoridad ta yegando cerca, e dos personanan abordo a purba di sigui core sin stop ignorando señalnan pa stop. Forzosamente autoridad a pone e speedboat stop, y asina a bin haya e speedboat aki carga cu como 14 bari di combustible, y tambe un cargamento masha grandi mes di 19 bulto cocaina y tambe marihuana.
Polis a bisa cu nan a intercepta e Speedboat aki na 37 miya nautico Noordoost di Puerto Bolivar. E dos persona abordo ta Luis Miguel Rincón (naci na Republica Dominicana), y Jose Antonio Colmenares Olivera (naci na Venezuela).
Forza Aereo di su banda a bisa cu e GoFast aki a wordo localiza danki na un cooperacion riguroso den cual nan a haya apoyo di e Unidad di Reaccion Rapido di Ehercito Colombiano, pa por a yega na e lugar unda e speedboat ilegal tabata y yuda cu e accion pa evita cu e boto aki a sali rapidamente di awanan teritorial Colombiano.
Ora cu Ehercito y Polisnan a bay pisa tur e droga cu a wordo haya den e GoFast, nan a haya 496 kilo di cocaina, y 9.4 kilo di marihuana. E droga aki posiblemente tabata rumbo pa sea Islanan ABC of pa Republica Dominicana pa asina e wordo poni pa drenta Puerto Rico pa finalmente yega mercado di Merca y Europa.
Ni 24 ora prome, Polis di Trafico na La Guajira a logra descubri den un vehiculo SUV un total di 80 kilo di cocaina cu tabata bin di e interior di e pais, y tabata rumbo pa beachnan di Alta Guajira, cu ta e mesun lugar cu ultimo tempo ta wordo usa pa saca droga riba lama rumbo pa mercadonan internacional. Di e mesun beachnan aki na Bahía Honda tambe e 496 kilo di cocaina a sali Diabierna rumbo pa Lama Caribe.
