Advertencia di DIARIO ta haya base den decisionnan di emergencia pa Covid-19 - *Islanan Ariba adverti pa posibel alarma di tormenta cu poco tempo pa prepara - *Siman nobo ta trece dos sistema mas cerca di region afecta pa Covid-19
ORANJESTAD (AAN) — Manera DIARIO a adverti for di siman pasa, Pueblo di Aruba mester cuminsa prepara pa enfrenta lunanan, den cual tanto clima como malesa lo lansa atake contra hende.
E alarma grandi cu ta wordo bati rond mundo pa Covid-19 ta mucho mas severo cu na 2020. Na diferente pais, Gobiernonan ta cuminsa tuma medidanan estricto contra Covid-19 despues cu poblacion mundial a neglisha e advertencianan contra un ola nobo y mas peligroso di Covid-19.
Informacionnan cu DIARIO a ricibi ayera di diferente parti di mundo ta, cu e siman aki por spera cu cantidad di pais lo cuminsa tuma medidanan fuerte pa sostene e necesidad di vacuna pa asina evita cu Covid-19 lo sigui avansa y laga su tras un saldo mucho mas halto di morto y hende permanentemente lesiona, cu hopi ciudadano na mundo ta pensa.
Mientras paisnan kier evita e sistema di cera porta pa otro, por spera cu e siman aki exigencianan pa vacuna lo bira mas grandi y cu cantidad di pais ta cuminsa tuma medida pisa contra personanan cu no kier vacuna of no ta vacuna.
Mientras Covid-19 ayera na ciere di e edicion aki di DIARIO tabata un preocupacion grandi na Merca y paisnan di Europa y Arubianonan cu kier biaha mester tene na consideracionnan cu cualkier momento medidanan por afecta exigencianan pa drenta un pais, DIARIO a sigui informa su mes di condicionnan di clima, cu e siman aki ta yega mas cerca di Aruba.
E temporada di horcan ta manifesta su mes directamente den un ola tropical cu por trece awasero awe, pero sigur den dos sistema cu por desaroya y exigi situacionnan di emergencia den Region di Caribe.
Manera por mira riba e ilustracion, dilanti entrada di region di Caribe tin un sistema cu e siman aki por sigui desaroya y haci cu paisnan den e parti Noord di region di Caribe mester bati alarma di tormenta.
National Hurricane Center a adverti poblacionnan di islanan mas Noord den Caribe, cu mester tene na consideracion cu den un tempo mas corto cu normal mester prepara pa tormenta cu por bati na porta.
Den tur caso ya advertencia a wordo emiti pa e islanan aki cu yobidanan hopi fuerte y condicionnan inclemente den tempo por wordo spera dor di e sistema mas cerca, cu ta wordo sigui pa otro sistema cu ta mas leu y cu por cuminsa tuma un rumbo mas zuidwest.
DIARIO ta trece dilanti, cu DIARIO no ta presenta ningun situacion di panico pa Aruba, pero si ta adverti cu e temporada activo di horcan a cuminsa cu sistemanan cu ta drenta region di Caribe.
Mester tene cuenta cu e condicionnan indirecto cu nan por activa manera e Zona di Convergencia Intertropical riba Venezuela.
E instancia pa informa Aruba di cualkier peliger, cu actualmente no ta existi pa Aruba ni ta na bista na e momentonan aki, ta Servicio Meteorologico di Aruba.
Den e situacion di Covid-19 cu ta kita atencion for di e realidad di preparacion pa temporada di horcan, DIARIO tin e deber y responsabilidad pa recorda Aruba, cu sistemanan tropical a cuminsa desaroya den e region y cu no tin ningun regla skirbi pa e forma cu sistemanan tropical ta avansa segun temperatura di lama, condicionnan favorabel of desfavorabel di biento entre otro.
