Cu solo directamente riba Aruba e realidad mundial ta presente
- Desastre natural a bira e amenaza grandi despues di Pandemia
- Transformacion mundial ta exigi atencion na Aruba tambe
ORANJESTAD (AAN)- Como matutino di Aruba, DIARIO tin e deber pa prepara Aruba pa tur loke por afecta e bienestar di e Arubiano.
2023 a bira un punto di contacto di cantidad di problema mundial, manera DIARIO semper a trece dilanti pero cu mas responsabilidad cu nunca, mester presenta na su lectornan.
Aruba na e momentonan aki ta den e temporada mas peligroso pa loke ta trata horcan, cu despues di a tene Aruba den estado di alerta pa e ruta nobo cu cambio di clima a habri, alcansa su momento cu por spera mas actividad.
Solo ta alcansa su punto mas halto den e segundo parti di 2023 na e momentonan aki y ta causa un sensacion di calor, cu ta un fenomeno cu hopi pais na mundo no tabata conoce como problema.
Ora copila informenan internacional un realidad grave ta wordo pinta cu acontecimentonan na paisnan rond mundo.
Na Antartica, Polo Sur. ceronan di ijs no ta resisti calor. Con importante e hecho aki ta, ta bira comprendibel ora realisa cu Antartica ta wordo considera como un tipo di airconditioning pa naturalesa rond mundo.
Un situacion serio ta presenta y ta destrui planificacion y tur loke hende a tuma como normalidad rond mundo.
Cambio di clima ta nifica cambio di bida pa hende.
Na cantidad di pais manera Portugal, Indonesia, Grecia pero tambe zonanan na Merca, candela ta destrui propiedad y trabou di hende.
Na otro paisnan inundacionnan ta presenta pa causa destruccion y morto.
Despues di un serie di informacion ayera, sigur mester bati alarma grandi a tur hende coopera den e intentonan garantisa nan propio bienestar pero tambe yuda den e intentonan pa scapa mundo di desastre y mas desastre.
Cuanto champagne un pais manera Francia por entrega mundo ainda dentro di poco tempo?
Preguntanan y mas pregunta cu ta bini dilanti sigur despues di tuma nota di rapportnan sumamente importante di autoridad riba tereno di condicionnan di clima manera ta e caso cu e rapport di World Meteorological Organization.
Tur hende awe mas cu nunca tin e deber pa proteha mundo contra un futuro sumamente tristo, cu lo afecta calidad di bida for di awor.
Informacionnan clave lo bay wordo presenta pa DIARIO pa asina tur hende por uni den e lucha contra cambio di clima, cu a bira un situacion desastroso cu ta afecta e naturalesa.
Paisnan ta uni den intentonan pa scapa selvanan na America Latino cu ta pulmon di Planeta Tera.
Poblacion mundial y tur ciudadano di tur pais, incluso Aruba, mester informa nan mes di e forma cu nan por aporta den bida diario cu e futuro di nos mundo.
Un transformacion mundial ta tumando lugar cu cambio di clima, cu ta evidente na Aruba tambe den e calor tremendo cu ta pone cu na paisnan friu, calor a bira un problema cu ta amenaza e ser humano!
