Biento fuerte posiblemente a benta palma grandi abao na Palm Beach

Ningun hende herida

ORANJESTAD (AAN): Den fin di siman, e diferencia di presion riba Oceano Atlantico a pone cu tabatin biento masha duro mes riba e isla.  Specialmente den oranan di madruga esaki tabata fuerte, y a bin den combinacion cu un disturbio den e area.

   Dialuna den oranan di mainta, por a nota cu un di e matanan conoci como ‘Sabal Palm’ cu tin instala net pariba di The Cove Mall na Palm Beach, a kibra den dos y cay.

   Esaki ta net na e cruzada di Irausquin Boulevard pa e caminda cu ta bay pa MooMba Beach.

   E area aki unda tin un edificio di 3 piso, lo a ‘canaliza’ e fluho di biento bin abao, y net aki a topa cu un afdak cu ta manda e biento fuerte riba e palo di e Palma aki.  Consecuencia ta cu el a scheur net den dos na su troncon, y a cay riba e acera di klinkers.

   E forma cu el a kibra ta masha straño, y e teoria ta keda cu ta biento.  Pero no ta conoci si acaso e palma lo tin malesa den e parti ey di troncon cu lo por a debilita e mata.  Loke ta bon noticia, y sigur pa puro suerte cu e no a cay riba turistanan canando eybanda.