Opinion
Cada pasa un tempo (ora cambia Gobierno) educacion ta bira topico di discusion y gruponan cu diferente interes ta purba influencia rumbo di educacion na Aruba.
Mester tene cuenta cu ARUBA no ta Hulanda, ni Merca ni ningun país Latino of di Caribe.
E bon si ta cu Aruba ta un isla/pais chikito cu un historia cu ta relaciona Aruba cu bida internacional activo cu ta cambia rapido.
E punto cardinal ta cu Gobierno mester cuminsa pensa mas riba e posicion internacional y no generalisa y dirigi tur educacion solamente riba un pais so , por ehempel Hulanda , pero mester crea educacion cu ta tene porta habri di moda cu hendenan di Aruba por funciona bon den/na Aruba mes y por sali bay biba y traha , sin mucho dificultad , den continente Europeo y Americano pa cuminsa.
Na prome instante lo pensa, wel bin cu diferente educacion, un cu ta cuadra cu Hulanda, un cu ta cuadra cu Merca, uno cu ta cuadra cu paisnan latino y laga e mayornan/studiantenan scoge cua educacion nan kier sigui.
Expertonan no mester organisa educacion na Aruba solamente dirigi riba studiamento afor , pero mester duna mas atencion na un educacion local cu ta cuadra di nivel di moda cu un studiante por bay studia afor tambe.
Pregunta: Ta bale la pena tuma over educacion/preparacion pa “ crèche”, “kleuter” y “basis” literal/letterlijk over di Hulanda ? Mi no ta kere , Aruba tin suficiente conocemento pa por bin cu propio contenido cu ta cuadra mas cu bida diario di Aruba.
Un cos si mester ta hopi cla (“duidelijk”): e educacion dirigi pa por funciona na Aruba mes ( educacion local ) , merece hopi mas atencion di moda cu ora un studiante caba un estudio na Aruba e por haya trabou cu ta cuadra cu su estudio. Ademas e studiante mester ta bon prepara pa por funciona riba su mes di forma practico ( con anda cu Gobierno , cu comercio etc etc ) den bida diario.
Falta hopi informacion y preparacion practico pa un hoben por funciona riba su mes ora e caba un estudio na Aruba.
Ban pa un otro punto cu ta toca “idioma”: no ta mas practico y bentahoso pa siña muchanan na Aruba (te cierto grado) solamente con “papia” (conversacion diario) e diferente idiomanan cu ta hopi usa manera “papiamento”, "ingles", “spaño” y “hulandes"?
E sabiduria cu mester existi na Aruba ta: con organisa e estudionan local ( dirigi riba bida diario di Aruba ) y na mes momento mantene e posibilidad habri pa por sigui studia den exterior.
Un encuesta general lo yuda pa haya sa opinion di personanan cu a lanta na Aruba y no a studia of biba den exterior, kico nan como hende grandi a haya falta di siña na scol cu nan tabata tin mester pa funciona independiente y bon na Aruba.
Forsa y exito cu cambionan den educacion na Aruba
Robert Arends
