Barco Hulandes a yuda captura 2.200 kilo cocaina den cuatro dia

ORANJESTAD (AAN): E barco di Marina Hulandes Zr.Ms. Holland, durante dianan 10 y 13 di Maart cu a pasa,

a intercepta cuater transporte di droga den Lama Caribe, y cu esaki a confisca un cantidad di mas cu 2,2 ton di cocaina.

   E asina yama speedboatnan tipo GoFast a keda descubri pa e avion maritimo di patruya di Wardacosta pa Caribe Hulandes.  Despues di e notificacion tocante e botonan rapido GoFast aki, e barco Zr.Ms. Holland a manda e helicopter embarca riba e US Coast Guard, hunto cu dos boto rapido di intercepcion den nan direccion.

   Dos di e cuater speedboat GoFast a entrega nan mes directamente. E otro dosnan a dicidi na reta autoridad, y sigui move.  Nan a stop te despues cu a los algun tiro di advertencia.

   E total di diez sospechoso hunto cu e contrabanda, a keda transferi pa US Coast Guard.  E contrabandistanan sospechoso lo keda persigui na Corte Federal na Merca, y contrabanda ya a keda destrui.

    Zr.Ms. Holland for di October 2022 ta activo den e region como Barco Patruyero pa Region Caribe Hulandes, y ta traha alternativamente hunto cu Wardacosta di Caribe Hulandes, y US Coast Guard.   Entre tanto tin 13.000 kilo di droga intercepta riba e lista di captura efectua pa Zr. Ms. Holland.