Vocero Robby Rosel:
ORANJESTAD (AAN) – Vocero di Bureau City Inspector, den entrevista cu DIARIO, a menciona cu manera comunidad di Aruba sa, Eagle Beach a wordo reconoci mundialmente, como e beach di mas limpi di Aruba.
Pesey City Inspector ta haci tur su esfuerzo pa tine limpi, pa e keda carga e nomber di e beach mas limpi y mas bunita di Aruba. “Nos a dicidi cu nos ta sigui cu esaki e aña aki, conhuntamente cu Ministerio di Naturaleza”, Rosel a expresa.
El a duna di conoce cu un rato despues e Inspectornan lo a sali reparti saconan pa tira desperdicio aden. “Nos a haci esaki pa epoca di carnaval y awo nos ta hacie pa Siman Santo. Y nos ta haci tambe e suplica na comunidad di Aruba, cu durante e siman aki ta cuminza for di Diasabra caba cu e campamento cu lo dura te cu dia 14 di April, pa tene e beachnan limpi, uza e saconan cu boso haya”, Rosel a indica.
E inspectornan mes ta pasa entrega e saconan, y nan a cuminza pariba y despues den e area pabao. Nan ta bay ta na Arashi, Talk of the Town, Palm Beach, Eagle Beach, San Nicolas. Inspectornan lo ta controlando riba beach y tambe pa reparti saconan na e comunidad di Aruba.
“Esey ta un trabao cu sigur nos ta hopi orguyoso di haci’e hunto cu Ministerio di Naturaleza, cu sigur ta carga esaki” Robby Rosel, vocero di Bureau City Inspector a reitera.
