Els Van Homelen, Directora:
ORANJESTAD (AAN): Directora di Stichting Voor Verstandelijk Gehandicapten Aruba (SVGA), Els Van Homelen a duna di conoce cu banda di e retonan tin hopi exito tambe den e ultimo añanan.
A logra di habri e cas pa mucha y hoben, Cas Blenchi, cu fondonan di e “Sociaal Crisis Plan Aruba”. E metodo di “Disciplina Consciente” ta wordo uza den cas pa traha mas miho posibel na e desaroyo di e muchanan.
Cu fondonan di Samenwerkende Fondsen y hopi ayudo di communidad a logra un camber pa cada habitante di Cas Sjabururi. Esaki ta mehora e calidad di bida di e habitantenan substancialmente.
A cuminsa un cooperacion exitoso cu Stichting Ambiente Feliz na Centro di Cuido na San Nicolas. Akinan hunto ta maneha un pasadia pa muchanan cu discapacidad multiple pa esnan cu ta biba cerca nan mayornan y esnan cu ta biba den e casnan di Stichting Ambiente Feliz na Centro di Cuido.
Scol Dun’un man a pasa den un trayecto hopi exitoso di mehora calidad door di implementa liñanan di siña y e metodo “Disciplina Consciente”.
Ademas desde e aña aki tin un klas special pa vaknan creativo y desaroyo social-emocional y tin lesnan special pa haya conocimento di e mundo digital. Nan scol a logra bin cu e producto di pesto di calidad halto tambe cu ta rekeri plantacion y trabao di cushina di e alumnonan.
Pa cu productonan cu ta wordo produci na nan departamentonan como parti di e programa di e clientenan por menciona tambe e bunita belanan di Centro Man na Obra, y e dushi te di Pasadia Briyo di Solo.
Pronto lo bin producto nobo door cu a caba di haya e bon noticia di Cede Aruba cu a acorda un proyecto pa cumpra un mashin pa 'shredder tuinafval' pa traha gordura y tin un mashin nobo pa 'graveer' cu ta duna hopi oportunidad pa productonan nobo.
E bendemento di producto ta yuda pa cu fundraising pa gastonan pa nan clientenan y alumnonan. Awor ta 5 aña caba cu RIU hotel ta sponsor fysiotherapie pa e muchanan di Pasadia Bibito Pin y Pasadia Centro di Cuido. E aña aki kier amplia esaki pa e muchanan di scol Dun’un man tambe.
E donacion aki ta haci un diferencia grandi pa e muchanan di SVGA y di Stichting Ambiente Feliz. Tin cooperacion cu Kooyman y Fantastic Garden unda e clientenan di Man na Obra ta bay traha den grupo un par di biaha pa siman y Martijn Trading ta trece trabao pa nan clientenan di Man na Obra pa nan traha na nan centro mes.
"Nos clientenan ta hopi orguyoso di kico nan por nifica pa comunidad door di traha pa e companianan aki", Els Van Homelen a expresa.
