Andy Lee a huramenta dilanti Rey Willem Alexander como miembro di Raad van State pa Aruba

Minister Evelyn Wever-Croes:

ORANJESTAD (AAN): Siman pasa Rendolf (Andy) A. Lee a huramenta dilanti di Rey Willem Alexander na Paleis Noordeinde como miembro di Raad van State pa Aruba. E funcion aki a worde ocupa durante e ultimo 6 añanan pa señora Milly Schwengle, cu a haci un excelente trabao den representa Aruba dignamente.

   Señor Lee tin un trayectoria profesional hopi amplio y sigur tabata un decision adecua di e representantenan di un comision independiente pa scoge señor Lee pa representa Aruba den e funcion aki. Basa riba e recomendacion aki, Conseho di Ministronan di Reino, durante e reunion di diabierna mainta 24 di November, a aproba su nombramento.

   Prome Minister Evelyn Wever-Croes a expresa di ta contento cu Aruba tin un representante pa Aruba den Raad van State, cu e cualidadnan y experiencia amplio cu señor Lee ta posee, pa por tuma e miho decisionnan den bienestar di pais Aruba. Señor Lee ta un politicologo cu tin mas di 30 aña di experiencia den sector publico y semi-publico na Aruba, Curaçao y Washington, Director di CBS Aruba, y Gerente di Departamento di Investigacion di Banco Centraal Aruba. Tambe, e tabata  miembro y presidente di Parlamento entre 2009 y 2010. Despues el a fungi como Minister Plenipotenciario na Washington pa Aruba y tabata consehero di Prome Minister entre 2018 y 2020.

   Despues di su huramentacion diaranson ultimo, señor Lee a cuminsa traha inmediatamente den Raad van State pa Aruba. Den nomber di Gobierno di Aruba, Prome Minister ta felicita señor Lee y ta dese'e hopi exito den e encargo nobo aki.