Yolanda y Miranda a informa DIARIO:
ORANJESTAD (AAN) - Yolanda Wolter, di Grupo Curazon Jong, cu ta consisti di personanan 60 plus di Paradera y Becindario, a menciona den entrevista cu DIARIO cu nan tin tres aña di ta activo.
Nan ta topa otro tur Diaranzon cu fisio-fit, y tur Diabierna cu baile-terapia.
Nan ta adultonan mayor di cual hopi ta basta vital ainda, y nan ta participa di tur actividad cu nan tin. E grupo ta creciendo y yegando casi 70 miembro, loke ta nifica cu nan ta bayendo bon. Aworaki tin hende riba lista di spera pasobra nan kier bay afo y no tin espacio pa tanto hende bay hunto.
Seguidamente, señora Miranda Bareño, miembro di e directiva di Curazon Jong, a bisa cu e meta di e grupo ta haci movecion pasobra e ta hopi importante pa socializa y adulto mayor topa cu tur hende, pasa leuk y sanamente.
Tambe nan ta haya cu adulto mayor mester sigui siña, y nan tabata bezig cu un lectura con pa ta mas sigur den trafico.
P’esey nan a pidi meneer Thomas Ruiz di VRA ken a bin siman pasa pero tabata tin asina hopi pregunta cu el a wordo pidi pa bin un biaha mas. Nan a puntra tanto cambio cu tin den trafico, cu nan no tabata na haltura di dje. Un dama a puntra di con no ta pone programa den television tocante e cambionan den trafico.
Señora Bareño ta haya esaki masha importante pasobra e adulto mayor no kier keda cas, e kier sali anochi den su auto, pero nan ta sinti insigur, y si algo pasa nan ta bise ta su culpa.
Como un grupo hopi activo nan tin un plan di actividad pa henter e aña, por ehemplo, pa Dia Internacional di Hende Muher y tin como invitado pa bin duna un charla, ex-gobernador Ella Tromp-Yarzagaray. Gobernador Boekhoudt a duna nan un lectura, Notario tambe, pues tur cos cu ta actual, e miembronan di Curazon Jong kier sa algo mas.
