Ministro Dowers a admiti
ORANJESTAD (AAN): Den e reunion di Diabierna pa trata e Presupuesto 2025 di pais Aruba, Ministro mr.drs. Arthur Dowers a ricibi pregunta si acaso proceso pa busca un Comandante nobo di Cuerpo di Bombero na Aruba ta andando of no.
E titular a contesta cu e proceso aki di busca Comandante nobo no a cuminza ainda na Aruba. E motibo cu esey ta asina, ta debi cu e Comandante actual tin un apelacion den Corte di Husticia. E proceso pues no a start, y Gobierno no tin libertad completo pa nombra hende na Brandweer pa aworaki.
Tambe Ministro a splica cu e norma- y exigencianan di Organizacion ICAO pa Aeropuerto di Aruba actualmente no ta wordo completamente cumpli door di Cuerpo di Bombero. Pero segun Dowers, ta asina cu ta haciendo esfuerzo grandi pa yega na e materialnan necesario pa por cumpli. Pero aworaki mes no ta cumpli completamente cu e standardnan.
No ta esey so, el a splica cu e personal ni e edificionan no ta completamente optimal pa garantiza cu ta cumpli cu e normanan cu Aruba tin di cumpli cune. Sinembargo ta wordo traha riba nan.
Por pone Cuerpo di Bombero na Sabana Berde cay directo bao di AAA NV cu ta maneha Aeropuerto? Esaki no ta andando aworaki, pero si e Ministro ta haya interesante pa fula tera riba e asunto aki.
