Awor na planta di WEB mes nan ta refurbish Turbo Cartridge

E ta un pieza clave di motornan RECIP

ORANJESTAD (AAN): E siman aki, diferente empleado y demas contratistanan di WEB Aruba y representantenan di compania Accelleron a bini hunto pa finalisa y celebra e proyecto Turbo LifecycleCare.

   Despues di palabranan di elogio di director di WEB, Alfredo Koolman y di CEO sr. Ihab Hlayel di Accelleron, a finalisa oficialmente e prome 'refurbish' di un Turbo Cartridge (TC).

   Casi 10 luna pasa, esta dia 8 di November 2023, a tuma lugar e firmamento di e acuerdo cu Accelleron pa percura e disponibilidad di piesa y servicio esencial pa e ‘Turbo Cartridges' pa un termino di 10 aña. Un turbocartridge ta un piesa critico pa funcionamento eficiente y confiabel di motornan RECIP.

   Desde aña 2006 WEB ta manda TC bay service den exterior, cual ta trece hopi reto. Tin hopi exigencia principalmente debi na e peso y e hecho cu carga por sali di Aruba solamente cu Air freight. Ta obvio cu gasto di carga y flexibilidad den operacion a pone cu a cuminsa sondea e opcionan di tin e TCnan semper on-site, cla pa uzo. Desde cu e esfuersonan a start na 2019 te cu awor, a tuma casi 5 aña pa logra pero awe e ta un realidad.

   E acuerdo cu Accelleron ta ofrece e oportunidad pa ehecuta trabounan di mantencion y reparacion di TCnan na Aruba, door di expertonan di Accelleron y cu sosten di empleadonan di WEB. Esaki ta contribui na un operacion confiabel, eficiente y continuo. E shop on-site ta habri un porta pa mecaniconan yiunan di tera ta mas prepara pa gana experiencia den kita turbo for di motor pero tambe pa siña con ta service un turbo for di comienso te final.

   Cu e shop y asistencia di Accelleron on-site, empleadonan di Onderhoud Centrale di WEB tin e oportunidad di observa mas di cerca e “cause and effect” cu tin riba nos turbo cartridges. Asina lo por traha hunto cu accelleron pa averigua con por minimalisa daño na TCnan door di factornan exterior.