Minister Ursell Arends ta relata con e procesonan di reorganizacion di Arubus ta tumando lugar
ORANJESTAD (AAN) Minister di Transporte, Naturaleza, Integridad y Asuntonan di Adulto Mayor, señor Ursell Arends, den un entrevista cu DIARIO a actualiza informacion tocante e procesonan di reorganizacion, cu ta tumando lugar den e compania nacional di transporte publico, Arubus.
E mandatario a duna di conoce cu for di 1 di Augustus tin un director so a keda den Arubus. E manera con e infrastructura di Arubus ta hinca den otro, ta duna oportunidad pa tin dos director: uno cu ta e CEO (Director Ehecutivo) y otro cu ta e CFO (Director Financiero).
“Na e momento aki e CFO mes ta liderando e compania, y a haci palabracionnan cu Raad, y a tene un reunion cu ne, p’asina aki nan por sigui zorg pa e reorganizacion di Arubus por sigui tuma lugar”, Minister Arends a señala.
Despues di un siguiente reunion cu a tuma lugar cu e directiva, e mandatario tabata na spera di un update pa wak kico tur ta tumando lugar den e reorganizacionnan.
E dignatario a bisa cu, pa loke ta trata e raad mes, nan mes lo ta e directiva apunta pa Arutram y Aruparking, y fuera di esaki lo apunta e managernan na ambos compania. “Y mi ta wardando un update aworaki pa loke ta trata e raad, kico ta e cambionan cu ta bay tuma lugar. Pero si, mi mester menciona cu pa e restructuracion cu ta bay tuma lugar, pa nos mira adelanto na Arubus, ta tackle e parti comercial pero tambe e parti social, y esaki ta e trayectoria cu ta bay cana banda di otro, mirando cu e compania aki ta debe mas di 18 miyon florin na belasting, y esaki ta cosnan cu nos ta bay regla pa asina aki e compania para riba su pia”, e mandatario a splica.
El a agrega cu e ta kere cu como un compania estatal, cu gobierno ta unico accionista, mester ta ehempel pa otronan, cumpli cu deber tambe cu belasting hunto cu e premienan di e trahadornan, y esaki ta cosnan cu gobierno kier mira adelanto. Asina e mandatario a subraya.
“Aña 2023 cu 2024 ta up to date cu belasting, esey ta algo cu, como accionista a bisa cu nos kier zorg pa e compania paga esakinan, y aworaki ta negociando pa yega na un areglo di pago con ta bay atende cu e debe atrasa”, e dignatario a subraya.
Minister Ursell Arends a bisa cu dentro di poco lo duna mas informacion tocante Arubus mes. Lo inverti pa drecha e central di San Nicolas, pa tin adelanto, mirando cu esaki ta esun cu mas tanto ta wordo uza pa e usuarionan cu ta uza transporte publico pa yega nan trabao. “Nos ta mira cu inversionnan ta bay tuma lugar, unda cu e bushaltenan cu ta e critica mas grandi cu tin, no solamente di Arubus pero tambe di e busnan chikito unda cu nan ta para den solo, of awa ta muha nan prome cu nan por yega nan trabao”, Minister Arends a remarca.
El a señala cu esaki ta cosnan cu den e era cu nos ta biba mester wordo drecha, y gobierno lo inverti den esaki pa garantiza e usuarionan un servicio optimal.
Pa loke ta e fondonan, e mandatario a splica cu a haci reorganizacion den e presupuesto supletorio manera e ta, p’asina aloca fondonan pa Arubus por atende cu tur e desaroyonan aki.
