Cargamento grandi confisca na Merca
ORANJESTAD (AAN): E ta un situacion hopi condenable, ora bo realiza cu hasta pa malesa awendia bo ta haya no djis pildora y remedinan cu ta falso, pues ta contene nada di medicamento aden. Pero awor hasta pa productonan pa yuda hende diabetico, tin producto falso ta wordo fabrica.
Tabata mey-mey di luna di Juli, cu autoridadnan di CBP Border Protection na Merca a confisca un cargamento grandi di 694 caha, conteniendo un total di 118.566 par di meya falso pa Diabetico. Ora cu e cargamento a yega na Waf di Norfolk-Newport News na Virginia (Merca), nan a inspecciona e cahanan di e meyanan di catuna di marca Hugh Ugoli cu mester ta special pa diabeticonan. E cargamentonan aki a yega for di Turkia.
Awor na comienzo di Augustus, nan a confisca un otro cargamento di 165.707 par di meya cu a viola e marca registra di Catuna. Si acaso e meyanan aki tabata di berdad, nan lo tabatin un balor di 2.6 miyon Dollar.
Meyanan pa Diabetico ta meyanan special cu no ta elastico, pa reduci presion y evita cu pia ta hincha. Nan ta elimina friccion cu por causa nada di confort. Nan ta yuda e pia di e pashent keda seco tambe. Pues cualkier nivel di fabricamento bao di standard por empeora e salud y bienestar di pashentnan Diabetico.
Specialistanan di CBP Border Protection a verifica cu e meyanan aki tur ta falso. Nan a evalua nan calidad di catuna, y contenido.
Loke a asombra tur hende ta pa descubri cu hasta riba meya pa Diabetico bo ta haya hendenan sin escrupulo ta fabrica cos kens y haci comosifuera e ta bay yuda hende. Siendo cu e lo por empeora salud di cualkier persona.
E ta demostra cu anti-socialnan lo falsifica kico cu ta djis pa nan por gana placa cu ganashinan ilegal, sin importa e daño cu nan por causa e consumidornan. Riba e potret aki por mira parti di e caha y productonan falso di Meya Diabetico cu a wordo importa for di Turkia.
