Lider di MEP sra. Evelyn Wever-Croes:
ORANJESTAD (AAN): Lider di MEP, señora Evelyn Wever-Croes ta invita tur ciudadano cu tin mester di ayudo pa yena nan formulario di Impuesto 2021, na cede di Partido MEP.
Manera tur aña, Partido MEP ta brinda comunidad e servicio pa yena formulario di belasting. Señora Wever-Croes a recorda cu e servicio aki ta gratis. Esnan interesa mester traha un cita por yama number di telefoon 660-2837.
-Fechanan pa yena formulario na cede di MEP:
E fechanan pa luna di augustus ta: diamars 16, diahuebs 18, diasabra 20, diamars 23, diahuebs 25 y diasabra 27.
E fechanan pa luna di September ta: diamars 13, diahuebs 15, diasabra 17, diamars 20, diahuebs 22 y diasabra 24.
Orarionan lo ta: Diamars y diahuebs, parti mainta 9:00 am pa 12:00 pm y parti atardi 6:00-9:00 pm. Diasabra 9:00 am pa 1:00 pm.
Mescos cu aña pasa, biaha aki tambe e proceso lo bay solamente cu cita. Por haci un cita na number 660-2837 desde dialuna 1 di augustus di dialuna pa diabierna, di 9'or am pa 12'or pm y di 1'or pa 5'or pm. Ningun formularionan ta keda atras na Cede di MEP, pasobra ta trata di informacion confidencial, y no por core riesgo cu nan ta perde.
-Documentonan:
Pa por yena e formulario ta importante pa bo tin comprobante di entrada anual, sea di trabou of di pensioen, tambe di SVb. Y si bo tin debe cu bo ta paga interes, mester di comprobante di e interes paga den 2021.
Finalmente si tin yiunan ta studia den exterior, mester inclui comprobante di inscripcion di e yiu na e scol den exterior.
“Ekipo di profesionalnan, cu boluntariamente ta dispuesto pa yuda comunidad, ta cla pa yuda tur hende. Mi kier un biaha mas recorda cada ciudadano, paga impuesto ta deber di nos tur, pero no paga dimas impuesto. Yena bo formulario y entreg’e na tempo”, Lider di MEP, Evelyn Wever-Croes a expresa.
