Minister Dangui Oduber
ORANJESTAD (AAN): Manera cu DIARIO a trece dilanti caba den edicion di Dialuna, e aerolinea jetBlue ta elimina dos vuelo nonstop for di Newark y tambe for di Fort Lauderdale pa Aruba.
Awor Minister di Turismo Sr. Dangui Oduber a confirma cu el a ricibi detaye oficial for di Aruba Airport Authority (AAA) cu e aerolinea mericano jetBlue Airways a anuncia cu entrante 4 di januari 2023 no lo tin vuelo directo mas entre Aruba y Fort Lauderdale (Florida) como tambe entre Aruba y Newark (New Jersey).
E aerolinea a haci un anuncio caminda cu nan a indica cu lo stop por lo menos 37 ruta cu destinacion pa Caribe pa aña 2023. Entre e rutanan aki, Newark y Ft. Lauderdale pa Aruba tambe ta menciona.
Ta importante pa enfatisa cu e decision aki no ta un refleho di e mercado mericano di turismo pa cu Aruba. Al contrario jetBlue tabata tin un crecemento di 3% den aña 2022 compara cu aña 2019, no obstante dificultad nan di e pandemia.
Durante e ultimo lunanan jetBlue a haya nan mes cu hopi contratiempo operacional. Segun e aerolinea, e decision aki a wordo tuma pa asina nan por brinda un miho servicio y calidad na tur pasahero cu e capacidad operacional cu nan tin na e momentonan aki.
Pero tambe mester bisa cu na mes momento jetBlue a anuncia cu nan lo aumenta e vuelonan entre Aruba cu New York y tambe vuelonan entre Aruba cu Boston, pues esaki ta crea un balans den e “capacity gap”. E asientonan di vuelo cu Aruba ta perde di e dos destinacionnan cu ta Ft Lauderdale y Newark, ta wordo yena door di vuelonan cu lo aumenta desde New York y Boston. Actualmente tin 25 vuelo entre Aruba cu New York y 15 vuelo entre Aruba cu Boston pa siman.
Minister Dangui Oduber di su banda ta sigura pueblo di Aruba cu e team di Aruba cu ta encarga pa habri rutanan nobo lo sigui traha ariba esaki pa nos por avansa hunto como pais y yega bek na recuperacion completo di nos turismo.
