Awe ta dia special pa tur hende muher cu ta scuba dive pa bay yuda haci fondo di lama limpi

Evento na Mangel Halto

ORANJESTAD (AAN): E ciudadano Juan Mora, kende ta PADI-Instructor pa Nautilus Dive Center Aruba a indica na DIARIO, cu awe Diasabra 16 di Juli 2022 ta un dia special pa hendenan den mundo di buceo.

   El a bisa cu esey ta debi cu e fecha di 16 di Juli ta observa Dia di Conservacion Internacional y di Muhernan Buzo.

   Meta ta pa haci un cleanup di fondo di lama.  Esaki ta wordo haci pa mas di 6.000 centro di buceo PADI na 130 pais rond mundo.  E ta dirigi specialmente pa e muhernan scuba diver, y pa atrae mas ser femenino den e mundo di buceo, ya cu tin mas di 35% di esnan certifica cu ta ser femenino.

   Undersea cleanup:  Na Aruba, e cantidad di scuba diver local ta hopi abao.  E actividad di conservacion bao awa no ta hala hopi hende local pa participa.  Pero e momento a yega pa trece un cambio na esaki.

   Meta ta pa tur luna trata na integra esaki, y haci limpieza bao awa na e lama di Mangel Halto pa elimina desperdicio.  Fuera nan ta organiza charla riba hopi topico, incluyendo pa haya sa con fragil e coralnan ta.  Pues cu e charlanan aki ta trata na concientiza esnan cu ta usa lama, pa evita di tira anker riba e rif of riba coralnan.

   Segun Mora, esey ta algo cu nan ta notando ta socede hopi den fin di siman, ora botonan ta yega eynan cu musica tocando, y ta djis hisa benta anker, destruyendo e bida marino eybao.  Fuera di esey, e chens grandi cu ta laga sushedad tambe cay den lama, y esaki ta bay pega na fondo.

   E idea awor ta pa splica pakico no ta tira anker eynan.  Kizas e doño di boto no sa cu loke e ta haciendo ta perhudicando full un zona grandi di rif di coral, y perhudica un eco-sistema debil cu ta funcionando keto bay.

   Nan ta conciente cu hopi doño di boto no ta haci’e pa malo, pero djis simple nan no sa di e embergadura di benta anker abao asina cerca di oriya di Mangel Halto.

   Muhernan ta bay bao awa: E fecha di awe ta dedica como uno caminda muhernan ta bay scuba dive y recoge sushi for di bao awa, y bay clasifica cada uno den diferente categoria di desperdicio.

   Segun Juan Mora, claro cu e cabayeronan tambe ta bon bini pa duna un man.  Nautilus Dive Center a bisa cu riba e dia di awe, tur muher lo bay ricibi nan tanki di oxigeno completamente gratis pa bay haci e tarea aki.

   E ta un colaboracion pa duna un man na e limpieza di Diasabra.

   Muchanan tambe por scuba dive: A puntra Mora si muchanan tambe por cuminza bira activo cu e mundo di buceo.  El a bisa cu for di 10 aña en adelante, muchanan por participa na e programa di ‘Discover Scuba Diving’, cu ta algo cu ta dura 4 ora, cu un prijs special pa hobennan local.

   Ora di haci e curso, Nautilus ta hasta ofrece 2-pa-1 pa asina motiva mas hende pa participa y bira activo den Scuba Diving.