ORANJESTAD (AAN): Tabata Diahuebs anochi cu e sorteo di Lotto di Dia a conoce su “Roll Down”.
Esey nifica cu e jackpot a yega su maximo di 150.000 Florin, y e anochi ey mester tin ganador!
Sea ta gana e wega cu tur cinco number, of si acaso no tin ningun ganador eynan, lo pasa pa mira kende tin 4 number bon pa asina produci ganador.
E biaha aki sorprendentemente tabatin 3 ganador cu tur e numbernan 01, 20, 21, 22, 30 corecto.
Uno di e ganadornan aki a presenta Diabierna mainta caba na oficina di Lotto na Playa pa reclama su premio. E funcionarionan di Lotto a revisa e ticket, y ora di scan esaki, e computer a confirma cu Lennys a gana su 50.000 Florin cu Lotto di Dia Roll Down.
Lennys a splica cu el a gana esaki cumprando su numbernan vast.
Mesora a sigui cu e proceso pa transferi e premio electronicamente pa su cuenta di banco. Lennys a indica cu e ticket ganador el a cumpra na Rina Highway na Oranjestad.
