Awe ta cuminza desmantela e tanki existente riba sero di Alto Vista  

ORANJESTAD (AAN): Manera DIARIO a trece dilanti caba algun siman atras, e tanki di awa di Alto Vista ta for di servicio. 

El a wordo haci full bashi, como cu su “tempo a yega”, y tin di wordo reemplaza.

   Pesey mes por lo pronto, henter e area Noordwest di Aruba ta depende di e pomp gigantesco cu WEB Aruba NV tin instala banda di caminda grandi na Paradera, cu ta yuda pusha awa pa e distritonan ey, pa asina nan por keda cu presion di awa.

   Mientras tanto, awe Dialuna 28 di November lo cuminza cu desmantelacion di tanki di awa na Alto Vista. Esaki ta forma parti di WEB Aruba NV su plan pa construi un tanki nobo cu un capacidad mas grandi y traha di material mas sostenible. Reemplazo di e tanki di awa ta necesario pa por keda suministra awa di bebe di calidad den area di Noord, awor y den futuro. E trabou di desmantelacion ta tuma lugar durante e periodo di 28 di November 2022 te cu e di 2ndo mitar di Januari 2023.

   E trabou di desmantelacion lo tuma lugar 6 dia pa siman entre 7:00 am y 6:00 pm. Durante e periodo di desmantelacion lo por nota trafico di ekipo pisa den e area. Tambe ta existi e posibilidad di disturbio di ruido. Di antemano WEB ta pidi disculpa y ta spera di por conta cu comprension di habitantenan.

   E proyecto di Tanki Alto Vista ta forma parti di WEB su proyecto 'Upgrade Aruba Water Distribution Network'; un proyecto grandi cu ta encera renobacion di tankinan, pomp y tuberia rond nos isla, pero tambe den planta di WEB.